తాళ్ళపాక పదసాహిత్యం/నాలుగవ సంపుటం/రేకు 362

by తాళ్ళపాక అన్నమాచార్యులు

రేకు: 0362-01 లలిత సం: 04-363 అంత్యప్రాస

పల్లవి:

హరిహరి యిందరికి నబ్బురముగాని యిది
పరగ నీ దాసుఁడే పరతత్వవేది

చ. 1:

పొలసి మశకమండుఁ బొడమేటి జీవుని
తలఁపు బ్రహ్మాండాలు దాఁటిపోయీనీ
నిలువెంత నీఁటెంత నీమాయ లివి భువి
బలిమిఁ దెలియువాఁడె పరతత్వవేది

చ. 2:

తగిలి చూచిన నాత్మఁ దనుఁ గానరాదుగాని
జగమెల్ల దానైతే సరి గనీని
చిగురెంత చేగెంత శ్రీపతి యిందులో నీ -
పగటు దెలియువాఁడే పరతత్వవేది

చ. 3:

యేవంకఁ దనబుద్ది యెక్కడనుండునోకాని
శ్రీ వేంకటేశ నిన్నుఁ జింతించీని
పూవెంత ఫలమెంత పురుషోత్తముఁడ నీ -
భావమెరుఁగువాఁడె పరతత్వవేది

రేకు: 0362-02 సామంతం సం: 04-364 దశావతారములు

పల్లవి:

అల్లదెకో విజయధ్వజము జగ -
మెల్లఁ జేకొనియె నీతఁడు

చ. 1:

తొక్కనిచోట్లు దొక్కెటి తురగపు
రెక్కలమీఁదటి రేవంతుఁడు
చక్కుగ నసురల సంహరించి యిదె
దిక్కులు గెలిచెను దేవదేవుడు

చ. 2:

వోడక శంఖము నొగి చక్రముతో
సూడుకుఁ దిరిగేటి శూరుఁడు
యీడనుండి సురలిందరిఁ గాచెను
మేడెపు మన లక్ష్మీ విభుఁడు

చ. 3:

శరణన వారలఁ జయ్యన గాచిన
శరణాగత రక్షణ ఘనుఁడు
తిరమై యింతకు దిక్కె నిలిచెను
గరిమెల శ్రీ వేంకట విభుఁడు

రేకు: 0362-03 రామక్రియ సం: 04-365 కృష్ణ

పల్లవి:

ఎక్కడ నీ వుద్యోగ మెటు విచ్చేసేవయ్యా
యిక్కువ నీమహిమకు నెవ్వ రెదురయ్యా

చ. 1:

పల్లించి గరుడనిపై నీ వుబ్బుననెక్క
అల్లనాఁడె పారిజాత మడవికెక్కె
పల్లదపురుద్రుఁడును బాణునివాకిలి దొక్కె
చుల్లరి రాక్షసమూఁక సురసుర సుక్కె

చ. 2:

గరుడినిపై నీవు కడుఁబేరెములవార
ధరజలధరుల నమృతములు దేరె
నిరతిఁ గంసాదులనెత్తురు టేరులు వారె
పరులు నీకెదిరిన పగయెల్ల దీరె

చ. 3:

బంగారు గరుడనిపై నీవు వీదులేఁగ
చెంగట శ్రీ వేంకటేశ సిరులుమూఁగె
సంగతి నలమేల్మంగ సంతసాన విఱవీగె
పొంగారు దేవదుందుభులు పై పై వాఁగె

రేకు: 0362-04 వరాళి సం: 04-366 భగవద్గీత కీర్తనలు

పల్లవి:

సమమతినని నీవే చాటుదువు
రమణ నేరుపు నేరము లెవ్వరిని

చ. 1:

రావణాదులైన రాక్షసమితిలో
నీవే, దేవతలలో నీవేకావా
భావింప నసురలు పగ నీకు నేలైరి
యీవల సురులెల్ల హితులైరి

చ. 2:

సకల జంతువులకుఁ జైతన్యుఁడవు నీవే
వొకరు నీకుపరాక మొనరించేరా
అకట కొందరిఁ బాపాత్ములఁగాఁ జేసి
వెకలిఁ గొందరిఁ బుణ్యవిధులఁ జేసితివి

చ. 3:

అటుగాన ఇట్టాయ నట్టాయనననేల
యిటు నీచిత్తముకొలఁ దింతేకాక
గటియించి శ్రీవేంకటపతి నీదాసు
లిటువలె ఘనులై రిదివో నీకృపను

రేకు: 0362-05 ఆహిరి సం: 04-367 నామ సంకీర్తన

పల్లవి:

నే నవగుణి నైన నీకుఁ బోదు భువి
లోన భక్తవత్సలుఁడ వటు గాన

చ. 1:

పరమ పురుషా భవరోగ వైద్య
ధరణీధర మాధవ కేశవా
అరిది సంసారాన నలసితి నినుఁగను -
తెరు వేదొ వెర వేదొ తెలియ నే నిపుడు

చ. 2:

భువనాతీతా పుండరీకేక్షణ
నవనీతప్రియ నారసింహా
యివల నాయపరాధ మెంతైనఁ గలదు నా
వివరము చింతించి వెసఁ గావరాదా

చ. 3:

అగుణాసగుణా యాద్యంతరహితా
అగణిత శ్రీ వేంకటాద్రినాథ
నిగమగోచర నేను నీయాధీనమ నింతే
నగుఁబాటు గాకుండ ననుఁగావుమిపుడు

రేకు: 0362-06 కన్నడగౌళ సం: 04-368 మాయ

పల్లవి:

తల లేదు తోఁక లేదు దైవమా నమాయలకు
తెలిసియుఁ దెలియక తిరిగేము నేము

చ. 1:

తను వేఁటిదో యీ తలపోఁత లేఁటివో
యెనయు సంసార సుఖ మిది యేఁటిదో
వెనక ముం దేఁటిదో వివేక మెరఁగక
దినదినమును నేమో తిరిగేము నేము

చ. 2:

పుట్టు గిది యెక్కడో పోయేటి దెక్కడో
ఇట్టె యీ సిరులెల్లా నెక్కడెక్కడో
మట్టులేని హరి నిర్మాణ చక్రములోన
దిట్టలమై యేమేమో తిరిగేము నేము

చ. 3:

నేరు పేదో నేర మేదో నిలిచిన దొకటేదో
వూరకే నీ దాసులమై వున్నారము
చేరి నన్నేలినయిట్టె శ్రీవేంకటేశ్వర
గారవించి కరుణించి కావఁగదవే