కిష్కింధకాండము - సర్గము 57

శ్రీమద్వాల్మీకియరామాయణే కిష్కింధకాండే సప్తపఞ్చాశః సర్గః |౪-౫౭|

వాల్మీకి రామాయణము

రామాయణ కాండములు

1. బాలకాండము

2. అయోధ్యాకాండము

3. అరణ్యకాండము

4. కిష్కింధకాండము

5. సుందరకాండము

6. యుద్ధకాండము

7. ఉత్తరకాండము

శోకాత్ భ్రష్ట స్వరం అపి శ్రుత్వా తే హరి యూథపాః |

శ్రద్దధుః న ఏవ తత్ వాక్యం కర్మణా తస్య శంకితాః |౪-౫౭-౧|

తే ప్రాయం ఉపవిష్టాః తు దృష్ట్వా గృధ్రం ప్లవంగమాః |

చక్రుః బుద్ధిం తదా రౌద్రాం సర్వాన్ నః భక్షయిష్యతి |౪-౫౭-౨|

సర్వథా ప్రాయం ఆసీనాన్ యది నః భక్షయిష్యతి |

కృత కృత్యా భవిష్యామః క్షిప్రం సిద్ధిం ఇతో గతాః |౪-౫౭-౩|

ఏతాం బుద్ధిం తతః చక్రుః సర్వే తే హరి యూథపాః |

అవతార్య గిరేః శృంగాత్ గృధ్రం ఆహ అంగదః తదా |౪-౫౭-౪|

బభూవుః ఋక్షరజో నామ వానరేంద్రః ప్రతాపవాన్ |

మమ ఆర్యః పార్థివః పక్షిన్ ధార్మికౌ తస్య చ ఆత్మజౌ |౪-౫౭-౫|

సుగ్రీవః చైవ వలీ చ పుత్రౌ ఘన బలౌ ఉభౌ |

లోకే విశ్రుత కర్మా అభూత్ రాజా వాలీ పితా మమ |౪-౫౭-౬|

రాజా కృత్స్నస్య జగతః ఇక్ష్వాకూణాం మహారథః |

రామో దాశరథిః శ్రీమాన్ ప్రవిష్టో దణ్డకా వనం |౪-౫౭-౭|

లక్ష్మణేన సహ భ్రాత్రా వైదేహ్యా చ అపి భార్యయా |

పితుః నిదేశ నిరతో ధర్మం పంథానం ఆశ్రితః |౪-౫౭-౮|

తస్య భార్యా జనస్థానాత్ రావణేన హృతా బలాత్ |

రామస్య చ పితుః మిత్రం జటాయుః నామ గృధ్ర రాట్ |౪-౫౭-౯|

దదర్శ సీతాం వైదేహీం హ్రియమాణాం విహాయసా |

రావణం విరథం కృత్వా స్థాపయిత్వా చ మైథిలీం |

పరిశ్రాంతః చ వృద్ధః చ రావణేన హతో రణే |౪-౫౭-౧౦|

ఏవం గృధ్రో హతః తేన రావణేన బలీయసా |

సంస్కృతః చ అపి రామేణ గతః చ గతిం ఉత్తమాం |౪-౫౭-౧౧|

తతో మమ పితృవ్యేణ సుగ్రీవేణ మహాత్మనా |

చకార రాఘవః సఖ్యం సః అవధీత్ పితరం మమ |౪-౫౭-౧౨|

మమ పిత్రా విరుద్ధో హి సుగ్రీవః సచివైః సహ |

నిహత్య వాలినం రామః తతః తం అభిషేచయత్ |౪-౫౭-౧౩|

స రాజ్యే స్థాపితః తేన సుగ్రీవో వానరేశ్వరః |

రాజా వానర ముఖ్యానాం తేన ప్రస్థాపితా వయం |౪-౫౭-౧౪|

ఏవం రామ ప్రయుక్తాః తు మార్గమాణాః తతః తతః |

వైదేహీం న అధిగచ్ఛామో రాత్రౌ సూర్య ప్రభాం ఇవ |౪-౫౭-౧౫|

తే వయం దణ్దకారణ్యం విచిత్య సుసమాహితాః |

అజ్ఞానాత్ తు ప్రవిష్టాః స్మ ధరణ్యా వివృతం బిలం |౪-౫౭-౧౬|

మయస్య మాయా విహితం తత్ బిలం చ విచిన్వతాం |

వ్యతీతః తత్ర నః మాసః యః రాజ్ఞా సమయః కృతః |౪-౫౭-౧౭|

తే వయం కపి రాజస్య సర్వే వచన కారిణః |

కృతాం సంస్థాం అతిక్రాంతా భయాత్ ప్రాయం ఉపాసితాః |౪-౫౭-౧౮|

క్రుద్ధే తస్మిన్ తు కాకుత్స్థే సుగ్రీవే చ స లక్ష్మణే |

గతానాం అపి సర్వేషాం తత్ర నః న అస్తి జీవితం |౪-౫౭-౧౯|

ఇతి వాల్మీకి రామాయణే ఆది కావ్యే కిష్కింధకాండే సప్తపఞ్చాశః సర్గః |౪-౫౭|