పుట:రసాభరణము.pdf/34

శ్రీరస్తు

రసాభరణము

తృతీయాశ్వాసము

క.⁠

శ్రీశుఁడు శృంగారరసా ధీశుఁడు ధ్రువపట్టణేశుఁ డింద్రాదిదిశా ధీశమనోహరుఁడు హృషీ కేశుఁడు రక్షించు రుక్మిణీశుఁడు మమ్మున్.

⁠

క.⁠

మఱి సర్వరసోత్కర్షత నరయుచు బహుసంపదలకు నత్యాస్పద మై మెఱసిన శృంగారరసము తెఱఁ గంతయు విస్తరింతుఁ దేటపడంగన్.

⁠

మ.⁠

భువిశృంగారము రెండుచందములు సంభోగంబు నవ్విప్రలం భవిధంబు న్మఱి విప్రలంభము చతుర్భావంబులైయుండు నె య్యవి యంటే నభిలాష యీర్ష్య విరహాఖ్యానానువాసంబు లి ట్లు వివేకింపఁదగు న్విచక్షుణులు త్రైలోక్యకరక్షామణీ.

⁠

క.⁠

ఆలోకనభాషణములు నాలింగనచుంబనములు నాదిగ నెన్నం జాలిన బహురతితంత్ర శ్రీ లవి సంభోగనామశృంగారంబుల్.

⁠

⁠

అభిలాషాదులు—

⁠

ఉ.⁠

చూచితి నేత్రపర్వముగ శూరకులాంబుధిచంద్రుని న్సుధా వీచులకంటెఁ దియ్యనయి వీనుల సోఁకెఁ దదీయవాక్యముల్ నాచనుదోయి కబ్బె జతనంబుగఁ దత్పరిరంభసౌఖ్యము ల్వాచవి చేసె నవ్విభునివాతెఱ ధన్యత నొందితిం జెలీ.

⁠

చ.⁠

కలయకమున్ను రాగ మధికం బగునే నభిలాష యిద్దఱుం గలసినమీఁదఁ బాయుట తగ న్విరహంబు నిజేశుఁ డొండు తొ య్యలిఁ గవయంగ నవ్వనిత యల్గుట యీర్ష్య విదేశవాసులై నిలుచుట దాఁ బ్రవాసము గణింపఁగ నన్నియు విప్రలంభముల్.

⁠

వ.⁠

అభిలాషహేతుకం బగు విప్రలంభం బెట్టి దనిన.

⁠

ఉ.⁠

వీనుల కింపొనర్చు నరవిందదళేక్షణురూపసంపదల్ గానఁగఁ గోరు లోచనయుగం బిదె యిప్పుడు తృప్తిఁబొందె నా మేనికి ఘ్రాణజిహ్వలకు మేలగుసౌఖ్యము లెప్పు డబ్బునో మానిని యింతలోన నవమన్మథుఁ డెంత యలంచునోకదే.

⁠

వ.⁠

ఈర్ష్యహేతుకం బగు విప్రలంభం బెట్టి దనిన.

⁠