పుట:పద్మపురాణము (మడికి సింగన).pdf/89

ఉత్తరఖండము-ద్వితీయాశ్వాసము

57

తే.⁠

భువిఁ బ్రతిష్ఠలు చేసినపుణ్యుఁ డెపుడు నరక[1]గోళంబుఁ జూడక నాక మొందు మూలఫలపుష్పపత్రాదు లోలి నిచ్చు తరువు లెల్లప్పుడును బుణ్యతమము లగుట.

⁠ 70

ఆ.⁠

దట్టమైన నీడఁ దనరి మార్గముక్రేవఁ బొదలు తరువు లిచ్చు పుణ్యమునకు నశ్వమేధశతములైనను [2]సమముగా వనిరి ధర్మవేదులైన మునులు.

⁠ 71

క.⁠

ఇలఁ బక్షుల కాశ్రయమై ఫలియించెడి తరువు నఱకు పాపాత్ములు సం కెలలఁ బడి ఘోరనరకా గ్నులఁ గూలరె యమునిభటులు కొఱవులఁ జూఁడన్.

⁠ 72

తే.⁠

[3]వినుము రావియు వటమును వేము నొక్క టొకటి బిల్వకపిత్థంబు లుసిరికలును మూఁడు మూఁ డామ్రదశకంబు మొనసి వనము లొనర నిల్పిన నరకము నొందఁ డెపుడు.

⁠ 73

వ.⁠

మఱియు సకలవనంబులం దులసీవనంబు పరమపురుషార్థంబు గావున.

⁠ 74

ఉ.⁠

తులసీకానన మెవ్వరింట నలరున్ దోషాంధకారార్కమై తలఁప న్బొల్పగుఁ దద్గృహంబు ధరఁ దీర్థం బెందు నయ్యింటికిన్ బలిమి న్గాలుని కింకరవ్రజము రాఁ [4]బట్టించు నూహింపఁగాఁ దులసీగంధము గల్గుచోటు సుకృతస్తోమాలయం బెప్పుడున్.

⁠ 75

1. లోకంబు (మ-తి)
2. సపతుగా (తి)
3. ఆ. వినుము రావివటము వేము నొక్కొక్కటి, యును కపిత్థబిల్వయుసిరికలును, మూడుచింత లేను మొగిమావులును నిల్పు, నతడు నరకవాస మంద డెపుడు (మ-హై)
4. జంకించు (మ-హై)