ఈ పుట అచ్చుదిద్దబడ్డది
రేకు: 0205-03 రామక్రియ సం: 03-027 అంత్యప్రాస
పల్లవి:
ఇచ్చలోఁ గోరేవల్లా ఇచ్చే ధనము
అచ్చుతనామమె పో అధికపు ధనము
చ. 1:
నారదాదులు వొగడే నాలుకపయి ధనము
సారపు వేదములలో చాటే ధనము
కూరిమి మునులు దాఁచుకొన్నట్టి ధనము
నారాయణ నామమిదే నమ్మినట్టి ధనము
చ. 2:
పరమపదవికి సంబళ మైన ధనము
యిరవై భక్తులకెల్లా నింటి ధనము
పరగ నంతరంగాన పాఁతినట్టి ధనము
హరినామ మిదియ పో అరచేతి ధనము
చ. 3:
పొంచి శివుఁడు కాశిలో బోధించే ధనము
ముంచిన ఆచార్యుల మూలధనము
పంచి శ్రీవేంకటపతి పాలించే ధనము
నించి విష్ణునామ మదే నిత్యమైన ధనము