ఈ పుట అచ్చుదిద్దబడ్డది
రేకు: 0203-05 రామక్రియ సం: 03-017 కృష్ణ
పల్లవి:
భూమిలోనఁ గొత్తలాయఁ బుత్రోత్సవ మిదివో
నేమపు కృష్ణజయంతి నేఁడే యమ్మా
చ. 1:
కావిరి బ్రహ్మాండము కడుపులో నున్నవాని
దేవకి గర్భమున నద్దిర మోచెను
దేవతలెల్ల వెదకి తెలిసి కాననివాని
యీవల వసుదేవుఁడు యెట్టు గనెనమ్మా
చ. 2:
పొడవుకుఁ బొడవైన పురుషోత్తముఁడు నేఁడు
అడరి తొట్టెల బాలుఁడాయనమ్మ
వుడగక యజ్ఞ భాగ మొగి నారగించేవాఁడు
కొడుకై తల్లి చన్ను గుడిచీనమ్మా
చ. 3:
పాలజలధి యల్లుండె(డై?) పాయకుండే యీతనికి
పాలవుట్ల పండుగ బాఁతే(తా?)యనటే
ఆలరి శ్రీవేంకటాద్రి నాటలాడనే మరిగి
పేలరియై కడు పెచ్చువెరిగీనమ్మా