ఈ పుట అచ్చుదిద్దబడ్డది
రేకు: 9050-02 పళమంజరి సం: 04-565 జోల
పల్లవి:
పాలజలనిధిలోఁ బాయని
నీలవర్ణుఁడవట నీవా యిపుడు
చ. 1:
వెదచల్లుమణుల వేయిపడగలను
చెదరని మెరుఁగుల శేషునిపై
మృదువు బరపుగా మెల్లనె పొరలుచు
నిదురవోదువట నీవా యిపుడు
చ. 2:
పరమ మునీంద్రులుఁ బద్మభవాదులు
ఇరువంకల నుతియించఁగను
అరవిరిమోమున నల్లన నవ్వెడి
నిరతమూర్తివట నీవా యిపుడు
చ. 3:
పగటున సిరియునుఁ బరగిన ధరణియు
బిగియుచు నడుగులు పిసుకఁగను
తగు వేంకటగిరిఁ దనరుచు జెలఁగెడి
నిగమమూర్తివట నీవా యిపుడు