ఈ పుట అచ్చుదిద్దబడ్డది
రేకు: 0377-02 గుండక్రియ సం: 04-448 ఉపమానములు
పల్లవి:
సిబ్బితి పడఁగనేల చింతలఁ బొరలనేల
గొబ్బున మొదలి నీరు కొనకెక్కదా
చ. 1:
నెలవై తత్వార్థము నే నెరఁగకుండినాను
తలఁపులోపలివాఁడు తా నెరుఁగుఁగా
అలసి దేహమున నే నశుచినై యుండినాను
యిల నాయంతరియామి యెప్పుడూ శుచేకా
చ. 2:
తిరమై నేను దివ్యదేశముల నుండకున్న
ధర నాలోఁ బరమాత్మ తానుండుఁగా
నిరతి గుణముల నే నీచుఁడనైనాను
అరయ నాపాలిహరి యధికుఁడేకా
చ. 3:
వొగి నేఁ బరత్రంత్రుఁడనై వుండినాను నాలోన
తగిన స్వతంత్రుఁడు తాఁ గలఁడు గా
వెగటై నే నుండినా శ్రీ వేంకటేశుఁ డెదుటనే
వగలెల్లఁ దీర్చి వైవశమాయగా
