ఈ పుట అచ్చుదిద్దబడ్డది
రేకు: 0041-1 సామంతం సంపుటం: 06-172
పల్లవి:
దిమ్మరి గాకేల మాను ధీరుఁడైన కోనేటి
తిమ్మఁడు దా లోకమెల్లఁ దిరుగాడువాఁడు
చ. 1:
తోరమైన ముత్యాల తొళసిపూసల పెద్ద
పేరు దనవురముపై బెట్టినవాఁడు
గారవంపుఁ బచ్చఁబట్టు గట్టినవాడు వొ
య్యారపు గొల్లెతలఁ గూడాడినట్టివాఁడు
చ. 2:
పీలిచుట్టుదలవాఁడు పెదపెదకన్నుల
వాలుఁజూపుల సిరికి వలచువాఁడు
జాలిబెట్టి లోకమెల్ల జట్టిగొన్నవాఁడు తా
నేలనుండి మింటఁబాఱ గాలు చాఁచువాఁడు
చ. 3:
కొండ మోఁచినట్టి వాఁడు కొండ వేల నెత్తువాఁడు
కొండంత రాకాసులఁ గొట్టినవాఁడు
కొండవంటిదొరయైన కొండల కోనేటివాఁడు
కొండమోఁపరుల నెల్లఁ గూడపెట్టినాఁడు