ఈ పుట అచ్చుదిద్దబడ్డది
రేకు: 0033-6 శ్రీరాగం సంపుటం: 06-129
పల్లవి:
రాను మీకడకు వోరమణులార పూవుం
బానుపు హరికి నేఁ బఱవవలయు నేఁడు
చ. 1:
చెలఁగి దేవుండు నేఁడు సిరితో నేఁటికి నో
పొలయలుకలవలపులు నటించి
తలఁపోఁత విరహవేదనల నున్నాఁడు ఈ
చలిమందు లతనికి చాఁతవలయు నేఁడు
చ. 2:
రమణుం డిప్పుడు ఇందిరాదేవియెదుటను
తమకించి యెవ్వతెనో తలంచెనట
కమల గోపింపం గాఁకల నారగింపండు ఈ
హిమజల మతనికి నీయవలయు నేఁడు
చ. 3:
వెలఁదిఁ బాసి తిరువేంకటేశ్వరుడు
కలికియై కౌఁగిటఁ గలసెనట
తిలకము గరఁగేటి తిరుమేనిచమట యీ
వెలినుండి పలుమారు విసరవలయు నేఁడు
