కలశహస్తలక్షణము
క. |
విను మర్ధచంద్రహస్తము
నిననుత! కరయుగమునందు నెదురెదురుగనుం
గొనవ్రేళ్ళు వంచిపట్టిన
ఘనకలశకరంబు నదియె గస్తురిరంగా!
| 19
|
వినియోగము
చ. |
చెలువుగఁ బూర్ణకుంభమును శ్రీధర! యింకను నారికేళముం
బలుమఱు గొప్పగుండ్లనును బాగుగ గుమ్మడికాయఁ జూపనున్
ఎలమిని గుక్షికిన్ మిగుల నింపుగ నీకలశంపుహస్తమే
చెలఁగును వాసుదేవ! భవసేవిత! కస్తురిరంగనాయకా!
| 20
|
ఉత్సంగహస్తలక్షణము
గీ. |
మొనసి మృగశీర్షహస్తముల్ ముందు వెనుకఁ
బరఁగ మణిబంధములఁ జేర్చి పట్టియున్న
నొనర నుత్సంగహస్త మై ఘనత కెక్కు
రాక్షసవిరామ! కస్తురిరంగధామ!
| 21
|
వినియోగము
గీ. |
ఎనసి పితృవందనమునకు నింపు మీఱఁ
సరగ నాలింగనమునకు సన్నుతాంగ!
చెల్లు నుత్సంగహస్తంబు చెన్ను మీఱ
రాక్షసవిరామ! కస్తురిరంగధామ!
| 22
|
శివలింగహస్తలక్షణము: వినియోగము
చ. |
చెలువుగ దక్షిణంబయినచేతను నాశిఖరంబుఁ బట్టియుం
బలుమఱు వామహస్తమున బాగుగ బట్టియు నర్ధచంద్రము
న్నెలమిని రెండుఁ జేర్చినను నింపుగ నాశివలింగహస్తమై
యలరును లింగభావనకు నంతటఁ గస్తురిరంగనాయకా!
| 23
|