తాళ్ళపాక పదసాహిత్యం/మూడవ సంపుటం/రేకు 233
రేకు: 0233-01 రామక్రియ సం: 03-186 దశావతారములు
పల్లవి:
ఎదిరించి పోట్లాడ నెవ్వరితరము లిఁక
త్రిదశవంద్యుఁడు హరిఁ దేరి చూడఁగలరా
చ. 1:
ఘాత మీస మదరితే గగ్గులకాడవుదురు
యీతఁడు దలచూపితే నెదిరించ రరులు
ఆతురాన గొరిశరాయడికి నోపఁగలేరు
చేతిగోరు మీటితేనే ఛిన్నభిన్న మవుదురు
చ. 2:
పైపై నితఁ డడుగిడ పాతాళానఁ గుంగుదురు
కోపించినంత నెత్తురుగుండాల పాలౌదురు
తూపు చేత నంటితేనే తుత్తుమురై పారుదురు
రాపునీలికాశ గంటే రణభీతి గొందురు
చ. 3:
మంతన మీతఁ డాడితే మానము గోలుపోదురు
కొంత గుఱ్ఱ మెక్కితేనే గుంటఁ గూలిపోదురు
యింతటా శ్రీవేంకటేశుఁ డెక్కడఁ జూచినఁ దానే
వింత ప్రతాపముతోడ విఱ్ఱవీఁగీ నిదివో
రేకు: 0233-02 వరాళి సం: 03-187 భక్తి
పల్లవి:
కలిమి గలిగియు నధమగతి యదేల
బలిమి గలిగియు లోఁగి బతిమాలనేల
చ. 1:
ఇలువేలుపొకఁడు హరి ఇంటనే వుండఁగా
పలు వేలుపులతోడి భ్రమతలేల
మెలఁగి సూర్యు డొక్కఁడు మిక్కిలిని వెలుఁగఁగా
వెల లేని దీపములు వేయి నేమిటికి
చ. 2:
హరిభక్తి యొక్కటే ఆత్మలో నుండగా
పరయుక్తు లెంచేటి పనులేల
సిరులఁ జింతామణటు చేతిలో నుండఁగా
సరి గాజుఁబూస మెచ్చఁగ నదేమిటికి
చ. 3:
నాలుకను మంచి హరినామ మొకటుండగా
గాలిఁ బోయెటి వూరగాథ లేల
యీలీల శ్రీవేంకటేశుఁ డెదుటనె వుండగా
మూలలకుఁ జేచాఁచి మొక్క నిఁకనేలా
రేకు: 0233-03 గుండక్రియ సం: 03-188 శరణాగతి
పల్లవి:
నీవే యెరిఁగి సేయు నీ చిత్తము వచ్చినట్టు
తావులఁ గొసరేనన్నా తనివోదు నాకు
చ. 1:
హరి నిన్ను నమ్మితి నే నననెట్టు వచ్చు నాకు
ఇరవైన బుద్ధి నా ఇచ్చగాదు
వెరవున నొకటి నే విన్నవించెదనంటేను
సరి నీవు వెలిగాను స్వతంత్రుఁడఁ గాను
చ. 2:
యిట్టె నీపై భారము నే నెట్టు వేయఁగవచ్చు
పట్టి నీకుఁ బురుషార్థపరుఁడఁ గాను
గుట్టుతోడ నే నిన్నుఁ గొలువఁగఁ గొలువఁగఁ
యెట్టైనాఁ గానిమ్ము యెరఁగ నెవ్వరిని
చ. 3:
యింతటి దైవమవు ని న్నిఁక నెందు వెదకేను
చెంత శరణాగతుల చేతివాఁడవు
వింతగాదు నీకును శ్రీవేంకటేశ నాకును
అంతర్యామివి నీయానతిలో వాఁడను
రేకు: 0233-04 బౌళి సం: 03-189 శరణాగతి
పల్లవి:
ఇట్టి యవివేకబుద్ధి యే పనికి వచ్చునిఁక
జట్టిగొని నాగుణము చక్కఁజేయఁ గదవే
చ. 1:
హరి నీయిచ్చఁ బ్రపంచమంతా నీవు నడపఁగ
అరసి నీశక్తి దలియక నమ్మక
వెర వెరఁగనియట్టి వెఱ్ఱివాఁడ నే నొక్క-
దొరనంటాఁ బనుల కుద్యోగించేను
చ. 2:
అంతరాత్మవై నీవు అన్నియుఁ బెర రేఁచఁగ
బంతినే నీ మహిమెల్లా భావించక
చెంత నీసంసారము సేసేవాఁడ నే నంటా
దొంతుల కోరికలతోఁ దూరిపారేను
చ. 3:
ఆదినుండి స్వతంత్రుఁడవై యేలినట్టి నిన్ను
సోదించి శరణు నాఁడే చొరఁగలేక
యీదెస శ్రీవేంకటేశ యిప్పుడు నీదాఁసుడనై
నీ దయ కలిమితోడ నేఁడు మొక్కేను
రేకు: 0233-05 లలిత సం: 03-190 ఉపమానములు
పల్లవి:
ఓపితేఁ దానే తగిలి వోపకున్నఁ దానే మాని
మాపురేపు నలయించే మాయ మాకేలా
చ. 1:
చింతాయకుఁడగు(?) హరి చిత్తములో నుండఁగాను
వింతవింత విచారాల వెఱ్ఱి మాకేలా
చెంతల పరుసవేది చేతిలోనే వుండఁగాను
దొంతరవిద్యలతోడి దోవ మాకేలా
చ. 2:
తోడునీడై యచ్యుతుఁడు తొలఁగక వుండఁగాను
జాడ దప్పి తిరిగేటి జాలి మా కేలా
యేడనో కోకలు వేసి యేమియు నెరఁగలేక
వేడుకతో కొక్కెరాలవెంట మాకేలా
చ. 3:
వెల్లవిరై యెదుట శ్రీవేంకటేశుఁ డుండఁగాను
బల్లిదుఁ డీతనిఁ బాసి భ్రమ మాకేలా
యెల్ల ధాన్యములు మా యింటిలో నుండఁగాను
పాల్లి కట్టు దంచేమని బుద్ధి మాకేలా
రేకు: 0233-06 గుజ్జరి సం: 03-191 వైష్ణవ భక్తి
పల్లవి:
మాకేమి నీకరుణ మహాప్రసాదమనేము
నీకు నీదాసుల చేతినింద బెట్టుగాదా
చ. 1:
పమ్మి మిమ్ముఁ గొలిచినబంట్లఁ బరులు దమ
సొమ్మనుచుఁ దియ్యగాఁ జూచేదా
వుమ్మడి నీవిందుకెల్లా నూరకున్నఁగన మిమ్ము
నమ్ముమన్న వేదాలయానతి కొంచెపడదా
చ. 2:
నీముద్ర మోచినవారి నీచులు దడవఁగాను
యీమేర నడ్డమురాక యిట్లుండేదా
వోమక నీవీవేళ నూరకున్న నల్లనాఁటి-
సామజముఁ గాచినది సందేహించఁబడదా
చ. 3:
మీరు మన్నించినవారు మీవాకిలి గావ కేడో-
వారి వాకిలి గావఁగా వద్దనరాదా
నేరిచి శ్రీవేంకటేశ నేఁడు నన్ను గావకున్న
ధారుణి మీ దయే మిమ్ముఁ దప్పులెంచుకొనదా