తాళ్ళపాక పదసాహిత్యం/నాలుగవ సంపుటం/రేకు 367
రేకు: 0367-01 బౌళి సం: 04-౩93 దశావతారములు
పల్లవి:
ఓహో యెంతటివాఁడే వొద్దనున్నవాఁడే హరి
సాహసపు గుణముల చతురుఁడా యితఁడు
చ. 1:
జలధిలోఁ బవళించి జలనిధి బంధించి
జల నిధి కన్యకను సరిఁ బెండ్లాడి
జలనిధిలో నీఁది జలనిధి మధియించి
జలధి వెరించిన చలమరా యితఁడు
చ. 2:
ధరణికిఁ బతియై ధరణి గ్రుంగిన నెత్తి
ధరణికూఁతురుఁ దానె తగఁ బెండ్లాడి
ధరణిఁ బాదము మోపి ధరణి భారము దించి
ధరణీ ధరుఁడైన దైవమా ఇతఁడు
చ. 3:
కొండ గొడుగుగ నెత్తి కొండఁ దూఁటువడ నేసి
కొండకిందఁ గుదురై కూచుండి
కొండపై శ్రీ వేంకటాద్రి కోనేటిరాయఁడై
కొండ వంటి దేవుఁడైన కోవిదుఁడా ఇతఁడు
రేకు: 0367-02 శుద్ధవసంతం సం: 04-394 వైరాగ్య చింత
పల్లవి:
ఏమని చెప్పెద నిటమీఁద హరీ
శ్రీ మంతుఁడ నినుఁ జేరితి మిదివో
చ. 1:
వినుచున్నారము వెనకటిపాట్లు
కనుచున్నారము కలఁగేటివారల
దిన దిన భావము తెలిసీఁ దెలియదు
మనసున భయ మిసుమంతయు లేదు
చ. 2:
భువి నెరుఁగుదు మిదె పుట్టెడి దెసలను
తవిలి మరణములు దలఁచెద మట్లనె
వివరపు టాసలు విడిచీ విడువవు
నవమగు విరక్తి నాఁటదు వోయె
చ. 3:
చదివెద మిదివో సకల శాస్త్రములు
వెదకెద మిదె శ్రీ వేంకటేశ నిను
మదిలోనుండగఁ మరచివుంటి మిదె
యెదుటఁగంటి మిఁక యేలాపనులు
రేకు: 0367-03 లలిత సం: 04-395 శరణాగతి
పల్లవి:
ఆచార విచారా లవియు నే నెరఁగ
వాచామ గోచరపు వరదుఁడ నీవు
చ. 1:
తపమొక్కటే నాకుఁ దగు నీ శరణనుట
జపమొక్కటే నిన్ను సారెకు నుతించుట
వుపమొక్కటే నీవె వున్నతుఁడవంట
విపరీత విజ్ఞాన విధులేమి నెరఁగ
చ. 2:
కర్మమొక్కటే నీ కైంకర్యగతి నాకు
ధర్మమొక్కటే నీ దాసాను దాస్యము
మర్మమొక్కటే నా మతి నిన్నుఁ దలఁచుట
అర్మిలి నింతకంటే నవల నే నెరఁగ
చ. 3:
బలిమియొక్కటే నాకు భక్తి నీపైఁ గలుగుట
కలిమి యొక్కటే నీవు గలవని నమ్ముట
యెలమితో శ్రీ వేంకటేశ నీవు గతిదక్క
పలుబుద్దులు నేఁబొరలు భావనలేనెరఁగ
రేకు: 0367-04 లలిత సం: 04-396 శరాణగతి
పల్లవి:
పనిలే దేమియు నాకు పంపుడు నీబంట నింతే
యెనపిన తెడ్డు చౌ లెరుఁగునటవయ్యా
చ. 1:
మనసు నీ విచ్చితివి మాఁటలు నీ విచ్చితివి
తనువు నీ విచ్చితివి యంతర్యామీ
చెనసి నీదువల్లఁ జేసేకర్మపు బంట
నినుపుఁగణఁజాల నించుకొనవయ్యా
చ. 2:
సత్తున నీ విచ్చితివి చలము నీ విచ్చితివి
తత్తర మిచ్చితివి యంతర్యామి
యిత్తల నావల నీవు యెందుకైనఁ బెరరేఁచి
యెత్తుక యేమైన గడియించుకొనవయ్యా
చ. 3:
మాయలు నీ విచ్చితివి మదము నీ విచ్చితివి
ఆయపు శ్రీ వేంకటాద్రి యంతర్యామి
యేయెడ నేఁ జేసేటి యిన్నెపరాధాలు
వేయయిన నీ వెనక వేసుకొనవయ్యా
రేకు: 0367-05 బౌళి సం: 04-397 శరణాగతి
పల్లవి:
నిచ్చలూ లోకము చూచి నివ్వెరగయ్యీ నాకు
చెచ్చెర శ్రీ హరి నీ చిత్తము నాభాగ్యము
చ. 1:
జీవ మతిసూక్ష్మము చిత్తము చంచలము
భావము నిరాకారము భవమెల్ల నెయ్యము
యే విధులఁ బొరలెనో యిది నాబ్రదుకు
దేవుఁడ నీచిత్తము నాతేఁకువైన భాగ్యము
చ. 2:
వూరుపెల్ల గాలి నా వుపమెల్ల మాయ
కూరిమెల్ల మొరఁగు నా గుణము విచారము
నేరుపేదో నేరమేదో నిజము దెలియదు
శ్రీ రమణుఁడవు నీ చిత్తము నా భాగ్యము
చ. 3:
కాలము పారేటిదాడి కాయము తూంట్లబొంత
ఆలరి శ్రీ వేంకటేశ యది నీచేఁత
యేలాగు లెరఁగను యిటు నీ శరణనుటే
శీలము నాకు నీ చిత్తము నా భాగ్యము
రేకు: 0367-06 పాడి సం: 04-398 విష్ణు కీర్తనం
పల్లవి:
అమ్మే దొకటియును యసిమలోదొకటి యని
కమ్ముకొని నీయందే కలిగె నీమాఁట
చ. 1:
సరవితో నిను నుపనిషద్వాక్యములయందు
పురుషోత్తముడవనుచుఁ బొగడఁగాను
అరిది నారాయణివియై యమృత మొసఁగుచో
అరయ శ్రుతిదె విరోధంబాయ నీమాఁట
చ. 2:
తలపోయ ధర్మసంన్థాపనుఁడవని నిన్ను
చెలరేఁగి శాస్త్రములు చెప్పఁగాను
తలఁక కిటు గోప పరదారగమనము నీవు
యిలఁ జేయ శాస్త్రవిరహితమాయ నీమాఁట
చ. 3:
వైకుంఠపతి వనుచు వడిఁ బురాణములెల్ల
యేకమొకటే వశియించఁగాను
యీకడ శ్రీ వేంకటేశ్వరుఁడవైతి విదె
చేకొలఁది నిటు నీకె చెల్లు నీమాఁట