రేకు: 0348-01 దేవక్రియసం: 04-279 రామ
| పల్లవి : |
ఏమి చెప్పేది ప్రతాప మెట్టి విలుకాఁ డితఁడు
రాముఁడు వీఁడే మ్రొక్కుఁడు రణరంగధీరుఁడు
|
|
| చ. 1: |
విడిసెఁ గపిబలము వెస సముద్రము దరి
నడచె లంకపైఁ బౌఁజు నానాగతుల
తొడిగె రాముఁడు వింట దొనలోని బ్రహ్మాస్త్రము
పడే రావణుతలలు పంక్తులై ధరణిని
|
|
| చ. 1: |
చొచ్చిరి లంకలోను సుగ్రీవాంగదాదులు
తెచ్చిరి రాకాసి చెర తెప్పలుగాను
యిచ్చిరి జయధ్వనులు యింద్రాదిదేవతలు
మెచ్చిరందరు సీతాసమేతుఁడాయ నితఁడు
|
|
| చ. 1: |
మగుడెఁ బుష్పకముపై మహిమ నీతనిదండు
తగఁ బట్టము తా నేలె తమ్ములతోను
అగపడి శ్రీవేంకటాద్రిపై నిల్చె నితఁడు
జగదేకమూర్తి కౌసల్యాసుతుఁ డిపుడు
|
|
రేకు: 0348-02 మేఘరంజి సం: 04-280 రామ
| పల్లవి : |
ఇందులోనే కానవచ్చె నిన్నిటా నీ మహిమలు
చెంది నీవే దిక్కు మాకు సీతాపతిరామా
|
|
| చ. 1: |
దేవ నీకు వలసితే తృణము బ్రహ్మాస్త్రమాయ
భావించితే రాతికిఁ బ్రాణము వచ్చె
కావలసి యేసితే నాకాశముకట్లు దెగె
దైవమవంటే నీవే దశరథరామా
|
|
| చ. 2: |
కూరుచుక యేలితేను కోఁతులు రాజ్యముసేసె
కోరితేనే నీటిపైఁ గొండలు దేలె
సారెఁ గదలివచ్చె నీ సన్నల సంజీవికొండ
యేరీతి నీసరి వేరీ యినకులరామా
|
|
| చ. 3: |
సూటి నీవు దలఁచితే సురలు పంపుసేసిరి
చాటితేనే నీపేరు జపమాయను
ఆటల నీకతలెల్లా నాచంద్రార్కమై నిలిచె
గాటపు సిరుల శ్రీవేంకటగిరిరామా
|
|
రేకు: 0348-03 దేసి సం: 04-281 రామ
| పల్లవి : |
ఏమని చెప్పఁగవచ్చు నిదివో నీ ప్రతాపము
రామ రామభద్ర సీతారమణ సర్వేశ
|
|
| చ. 1: |
వెరవున హరువిల్లు విరుఁగఁ దీసిననాఁడే
అరయ విరిగె వీపు లసురలకు
వరుస వనవాసపువ్రతము పట్టినపుడే
పరులమతుల భీతి వట్టె రఘురామ
|
|
| చ. 2: |
వచ్చి నీవు దండకావనము చొచ్చిననాఁడే
చొచ్చిరి పాతాళ మసురలెల్లాను
ముచ్చటాడి చుప్పనాతిముక్కు గోసిననాఁడే
కొచ్చి దైత్యు లాస దెగఁ గోసిరి శ్రీరామ
|
|
| చ. 3: |
అడరి మారీచుపై నమ్ము విడిచిననాఁడే
విడిచిరి దానవులు వేడుకలెల్లాను
బడి విభీషణునిఁ జేపట్టితే రక్కసులెల్లా
చిడిసి మల్లెపట్టిరి శ్రీవేంకటరామ
|
|
రేకు: 0348-04 ముఖారి సం: 04-282 ఇతర దేవతలు
| పల్లవి : |
కొలువరో మొక్కరో కోరి తలఁచరో
చెలఁగి మనల రక్షించీని వీఁడె
|
|
| చ. 1: |
పాయపువాఁడు నల్లఁబల్లిచెన్నుఁడు
వేయినామములవెన్నుఁడు
పాయకకొల్చిన భక్తప్రసన్నుఁడు
యీయెడనే వరములు యిచ్చీని వీఁడే
|
|
| చ. 2: |
పరిపూర్ణుఁడు మహానుభావుఁడు
తిరమగు దేవాధిదేవుఁడు
పరమానందస్వభావుఁడు
గరిమెఁ గరుణతోఁ గాచీని వీఁడె
|
|
| చ. 3: |
తెలియుఁ డీతఁడె దేవాగ్రగణ్యుఁడు
వలనుగ యోగీంద్రవరేణ్యుఁడు
అలరఁగ శ్రీవేంకటాచలేశపుణ్యుఁడు
నలిఁ బ్రసన్నుఁడై నవ్వీని వీఁడె
|
|
రేకు: 0348-05 సామంతం సం: 04-283 రామ
| పల్లవి : |
రామునికి శరణంటె రక్షించీ బ్రదుకరొ
యేమిటీకి విచారాలు యిఁక దైత్యులాల
|
|
| చ. 1: |
చలమునఁ దాటికిఁ జదిపిన బాణము
లలి మారీచసుబాహూలపై బాణము
మెలఁగి పరశురాము మేట్లేసిన బాణము
తళతళ మెరసీని తలరో యసురలు
|
|
| చ. 2: |
మాయామృగముమీఁద మరి వేసిన బాణము
చేయి చాఁచి వాటి నేసిన బాణము
తోయధిమీఁద నటు తొడిగిన బాణము
చాయలు దేరుచున్నది చనరో దైతేయులు
|
|
| చ. 3: |
తగఁ గుంభకర్ణునితల ద్రుంచిన బాణము
జిగి రావణుఁ బరిమార్చిన బాణము
మిగుల శ్రీవేంకటేశు మేఁటిపొదలో నున్నది
పగ సాధించీ నిఁకఁ బారరో రాకాసులు
|
|
రేకు: 0348-06 నాదరామక్రియ సం: 04-284 వైరాగ్య చింత
| పల్లవి : |
అప్పటి సుఖమేకాని యటమీఁదెంచు కొనఁడు
ఉప్పతిల్లు జీవుని వుద్యోగా లిట్టివి
|
|
| చ. 1: |
తనుభోగపురతులు దలపోయుచుండుఁగాని
తన నరకకూపాలు దలపోయఁడు
కనకభూషణములు గని వెరగందుఁగాని
ఘనకర్మబంధాలకుఁ గడు వెరగందఁడు
|
|
| చ. 2: |
యీకడాకడఁదాఁ జేసేటియెమ్మెలే యెంచుఁగాని
పైకొని కూడేటిపాపము లెంచఁడు
దీకొని జగములోని ద్రిష్టములే చూచుఁగాని
భీకరపు జన్మముల పిరివీకు చూడఁడు
|
|
| చ. 3: |
వింతవింత మాటలవేడుకలే వినుఁగాని
అంతటఁ దాఁ బడేపాట్లవి వినఁడు
ఇంతటా శ్రీవేంకటేశుఁడేలఁగా నెరిఁగెఁగాని
యెంతచెప్పినాను బుద్ధి యిన్నాళ్ళు నెరఁగఁడు
|
|
