ఈ పుట అచ్చుదిద్దబడ్డది
రేకు: 0209-6 గౌళ సంపుటం: 08-054
పల్లవి:
వద్దు వద్దు మీలోన వట్టివాదులు
సుద్దుల మాటలకే సూడువట్టేరా
చ. 1:
పంతములాడితేనేమి బలిమిచెసితేనేమి
వింతలేని మనసుల వెలఁదులకు
దొంతర వలపులెల్ల తోడుతనే వెంటరాఁగా
యింతమాత్రపు వలఁపు లివి చెల్లవా
చ. 2:
గబ్బితనమైననేమి గర్వము చూపిననేమి
వుబ్బేటి జవ్వనముల వువిదలకు
నిబ్బరపు టాసలెల్ల నిండుకొని వుండఁగాను
అబ్బురపుఁ దమకములవి మానీనా
చ. 3:
కన్నుల నొక్కిననేమి కాఁగిలించుకొన్ననేమి
నిన్నుఁ గూడి వుండినట్టి నెలఁతలకు
మన్నించు శ్రీవేంకటేశ మరి నీ యాసవుండఁగా
సన్నపు మోవితీపుల చవులెక్కవా