ఈ పుట అచ్చుదిద్దబడ్డది
రేకు: 0238-4 వరాళి సంపుటం: 08-226
పల్లవి:
వేడుకకాఁడవు నీకు వెరుపలయ్యా
పాడిదప్పక యిచ్చేవు పంతాలేలయ్యా
చ. 1:
కావరించి వేగినంతా కలిగిన పనులెల్లా
వేవేలుఁ జేసివచ్చి వెరుపేలయ్యా
వోవరిలో నాచేతికి వొంటిఁజిక్కి యిప్పుడిట్టె
వోవలబెట్టెనంటా వొట్లేలయ్యా
చ. 2:
అంది పొంది వాడలోన అందరి యిండ్లనెల్లా
విందులారగించి వచ్చి వెరుపేలయ్యా
బందెఁజిక్కినట్టు మాపరువుపైఁ బవళించి
సందడిలో వారి వీరి సాకిరులేలయ్యా
చ. 3:
అచ్చముగా నన్నుఁ గూడి అన్నిటా శ్రీవెంకటేశ
విచ్చనవిడాయ నింక వెరుపేలయ్యా
మచ్చెము చిక్కెను నీమనసు నామీఁదను
వొచ్చెములెల్లాఁ దీరె నొడఁబాట్లేలయ్యా