ఈ పుట అచ్చుదిద్దబడ్డది
రేకు: 0232-5 కొండమలహరి సంపుటం: 08-191
పల్లవి:
ఇన్నాళ్లునెఱఁగమైతి మింతేసిసుద్దులు
విన్నవి రాఁగారాఁగా వెల్లవిరులాయను
చ. 1:
మంతనాన నీతోను మాటలు నేనాడినని
యింతులెల్లా నాడుకొనే రిదేమయ్య
చెంతల నీవింతేసి సిగ్గులు విడిచితేను
కాంతలు నీతో పొందుగావించుటే నేరమి
చ. 2:
రతివేళ నామేనరచించిన నీచేఁతలు
సతులెల్లా సోదించేరు సారెసారెకు
యితవై నీవాడికకు యింతేసి వెరవకున్న
హితులూడిగాలు సేయనేఁటికి నీయెడకు
చ. 3:
ననుపున నీవు నేను నవ్విననవ్వులకును
వనితలెల్లా మెచ్చేరు వద్దనున్నట్టే
యెనసితివి శ్రీవెంకటేశ నన్నింతేసిగాను
చనవరులకును మజ్జాతియాయ నిపుడు