పుట:2015.370800.Shatakasanputamu.pdf/252

సీ. దండంబు నీకు నుద్దండతేజశ్చండ!
               జోహారు భక్తదుర్మోహనాశ!
     మ్రొక్కెదఁ గోను జలముక్కాయ రుక్కాంత
               వందనం బిదె చిదానందకంద!
     నుతిసేతు శతధృతిస్తుతియుతోన్నతచర్య!
               ప్రణతిఁజేసెద మునిప్రణుతచరణ!
     సాష్టాంగ మిదె నీకు సాష్టాపదాంబర
               కేలు మోడ్చెద జగత్కేళిలోల!
గీ. వలదు వలదు పరాకు భావమున నీకు
     దీనజనములఁ గృపబోవ దిక్కు నీవ
     దుష్టుల వధించి పోషింపు శిష్టజనుల
     వైరిహరరంహ! సింహాద్రి నారసింహ!64
సీ. గరుడాచలంబుపైఁ గడకతో వసియించి
               సత్యభామాతటిచ్ఛాయ నలరి
     వరచాపమనియెడి హరిచాప మమరించి
               వివిధభక్తుల కృపావృష్టి ముంచి
     అమరమయూరవారము మోద మందించి
               దీనచాతకములఁ దృప్తినించి
     క్షత్రకన్యాకామ సస్యము ల్పండించి
               జగముల చల్లనై నెగడఁజేసి
గీ. నవఘనస్ఫూర్తిచే మురనరకధేను
     ఖరదవానలమార్చిన కడక నిపుడు
     రిపుల శిక్షించి రక్షించు పృథ్విజనుల
     వైరిహరరంహ! సింహాద్రి నారసింహ!65