శ్రీమద్భాగవత పురాణము - స్కంధము 10 - అధ్యాయము 90
| ←ముందరి అధ్యాయము | శ్రీమద్భాగవత పురాణము (శ్రీమద్భాగవత పురాణము - స్కంధము 10 - అధ్యాయము 90) | తరువాతి అధ్యాయము→ |
శ్రీశుక ఉవాచ
సుఖం స్వపుర్యాం నివసన్ద్వారకాయాం శ్రియః పతిః
సర్వసమ్పత్సమృద్ధాయాం జుష్టాయాం వృష్ణిపుఙ్గవైః
స్త్రీభిశ్చోత్తమవేషాభిర్నవయౌవనకాన్తిభిః
కన్దుకాదిభిర్హర్మ్యేషు క్రీడన్తీభిస్తడిద్ద్యుభిః
నిత్యం సఙ్కులమార్గాయాం మదచ్యుద్భిర్మతఙ్గజైః
స్వలఙ్కృతైర్భటైరశ్వై రథైశ్చ కనకోజ్జ్వలైః
ఉద్యానోపవనాఢ్యాయాం పుష్పితద్రుమరాజిషు
నిర్విశద్భృఙ్గవిహగైర్నాదితాయాం సమన్తతః
రేమే షోడశసాహస్ర పత్నీనాం ఏకవల్లభః
తావద్విచిత్రరూపోऽసౌ తద్గేహేషు మహర్ద్ధిషు
ప్రోత్ఫుల్లోత్పలకహ్లార కుముదామ్భోజరేణుభిః
వాసితామలతోయేషు కూజద్ద్విజకులేషు చ
విజహార విగాహ్యామ్భో హ్రదినీషు మహోదయః
కుచకుఙ్కుమలిప్తాఙ్గః పరిరబ్ధశ్చ యోషితామ్
ఉపగీయమానో గన్ధర్వైర్మృదఙ్గపణవానకాన్
వాదయద్భిర్ముదా వీణాం సూతమాగధవన్దిభిః
సిచ్యమానోऽచ్యుతస్తాభిర్హసన్తీభిః స్మ రేచకైః
ప్రతిషిఞ్చన్విచిక్రీడే యక్షీభిర్యక్షరాడివ
తాః క్లిన్నవస్త్రవివృతోరుకుచప్రదేశాః
సిఞ్చన్త్య ఉద్ధృతబృహత్కవరప్రసూనాః
కాన్తం స్మ రేచకజిహీర్షయయోపగుహ్య
జాతస్మరోత్స్మయలసద్వదనా విరేజుః
కృష్ణస్తు తత్స్తనవిషజ్జితకుఙ్కుమస్రక్
క్రీడాభిషఙ్గధుతకున్తలవృన్దబన్ధః
సిఞ్చన్ముహుర్యువతిభిః ప్రతిషిచ్యమానో
రేమే కరేణుభిరివేభపతిః పరీతః
నటానాం నర్తకీనాం చ గీతవాద్యోపజీవినామ్
క్రీడాలఙ్కారవాసాంసి కృష్ణోऽదాత్తస్య చ స్త్రియః
కృష్ణస్యైవం విహరతో గత్యాలాపేక్షితస్మితైః
నర్మక్ష్వేలిపరిష్వఙ్గైః స్త్రీణాం కిల హృతా ధియః
ఊచుర్ముకున్దైకధియో గిర ఉన్మత్తవజ్జడమ్
చిన్తయన్త్యోऽరవిన్దాక్షం తాని మే గదతః శృణు
మహిష్య ఊచుః
కురరి విలపసి త్వం వీతనిద్రా న శేషే
స్వపితి జగతి రాత్ర్యామీశ్వరో గుప్తబోధః
వయమివ సఖి కచ్చిద్గాఢనిర్విద్ధచేతా
నలిననయనహాసోదారలీలేక్షితేన
నేత్రే నిమీలయసి నక్తమదృష్టబన్ధుస్
త్వం రోరవీషి కరుణం బత చక్రవాకి
దాస్యం గత వయమివాచ్యుతపాదజుష్టాం
కిం వా స్రజం స్పృహయసే కవరేణ వోఢుమ్
భో భోః సదా నిష్టనసే ఉదన్వన్నలబ్ధనిద్రోऽధిగతప్రజాగరః
కిమ్వా ముకున్దాపహృతాత్మలాఞ్ఛనః ప్రాప్తాం దశాం త్వం చ గతో దురత్యయామ్
త్వం యక్ష్మణా బలవతాసి గృహీత ఇన్దో
క్షీణస్తమో న నిజదీధితిభిః క్షిణోషి
కచ్చిన్ముకున్దగదితాని యథా వయం త్వం
విస్మృత్య భోః స్థగితగీరుపలక్ష్యసే నః
కిం న్వాచరితమస్మాభిర్మలయానిల తేऽప్రియమ్
గోవిన్దాపాఙ్గనిర్భిన్నే హృదీరయసి నః స్మరమ్
మేఘ శ్రీమంస్త్వమసి దయితో యాదవేన్ద్రస్య నూనం
శ్రీవత్సాఙ్కం వయమివ భవాన్ధ్యాయతి ప్రేమబద్ధః
అత్యుత్కణ్ఠః శవలహృదయోऽస్మద్విధో బాష్పధారాః
స్మృత్వా స్మృత్వా విసృజసి ముహుర్దుఃఖదస్తత్ప్రసఙ్గః
ప్రియరావపదాని భాషసే మృతసఞ్జీవికయానయా గిరా
కరవాణి కిమద్య తే ప్రియం వద మే వల్గితకణ్ఠ కోకిల
న చలసి న వదస్యుదారబుద్ధే క్షితిధర చిన్తయసే మహాన్తమర్థమ్
అపి బత వసుదేవనన్దనాఙ్ఘ్రిం వయమివ కామయసే స్తనైర్విధర్తుమ్
శుష్యద్ధ్రదాః కరశితా బత సిన్ధుపత్న్యః
సమ్ప్రత్యపాస్తకమలశ్రియ ఇష్టభర్తుః
యద్వద్వయం మధుపతేః ప్రణయావలోకమ్
అప్రాప్య ముష్టహృదయాః పురుకర్శితాః స్మ
హంస స్వాగతమాస్యతాం పిబ పయో బ్రూహ్యఙ్గ శౌరేః కథాం
దూతం త్వాం ను విదామ కచ్చిదజితః స్వస్త్యాస్త ఉక్తం పురా
కిం వా నశ్చలసౌహృదః స్మరతి తం కస్మాద్భజామో వయం
క్షౌద్రాలాపయ కామదం శ్రియమృతే సైవైకనిష్ఠా స్త్రియామ్
శ్రీశుక ఉవాచ
ఇతీదృశేన భావేన కృష్ణే యోగేశ్వరేశ్వరే
క్రియమాణేన మాధవ్యో లేభిరే పరమాం గతిమ్
శ్రుతమాత్రోऽపి యః స్త్రీణాం ప్రసహ్యాకర్షతే మనః
ఉరుగాయోరుగీతో వా పశ్యన్తీనాం చ కిం పునః
యాః సమ్పర్యచరన్ప్రేమ్ణా పాదసంవాహనాదిభిః
జగద్గురుం భర్తృబుద్ధ్యా తాసాం కిమ్వర్ణ్యతే తపః
ఏవం వేదోదితం ధర్మమనుతిష్ఠన్సతాం గతిః
గృహం ధర్మార్థకామానాం ముహుశ్చాదర్శయత్పదమ్
ఆస్థితస్య పరం ధర్మం కృష్ణస్య గృహమేధినామ్
ఆసన్షోడశసాహస్రం మహిష్యశ్చ శతాధికమ్
తాసాం స్త్రీరత్నభూతానామష్టౌ యాః ప్రాగుదాహృతాః
రుక్మిణీప్రముఖా రాజంస్తత్పుత్రాశ్చానుపూర్వశః
ఏకైకస్యాం దశ దశ కృష్ణోऽజీజనదాత్మజాన్
యావత్య ఆత్మనో భార్యా అమోఘగతిరీశ్వరః
తేషాముద్దామవీర్యాణామష్టాదశ మహారథాః
ఆసన్నుదారయశసస్తేషాం నామాని మే శృణు
ప్రద్యుమ్నశ్చానిరుద్ధశ్చ దీప్తిమాన్భానురేవ చ
సామ్బో మధుర్బృహద్భానుశ్చిత్రభానుర్వృకోऽరుణః
పుష్కరో వేదబాహుశ్చ శ్రుతదేవః సునన్దనః
చిత్రబాహుర్విరూపశ్చ కవిర్న్యగ్రోధ ఏవ చ
ఏతేషామపి రాజేన్ద్ర తనుజానాం మధుద్విషః
ప్రద్యుమ్న ఆసీత్ప్రథమః పితృవద్రుక్మిణీసుతః
స రుక్మిణో దుహితరముపయేమే మహారథః
తస్యాం తతోऽనిరుద్ధోऽభూత్నాగాయతబలాన్వితః
స చాపి రుక్మిణః పౌత్రీం దౌహిత్రో జగృహే తతః
వజ్రస్తస్యాభవద్యస్తు మౌషలాదవశేషితః
ప్రతిబాహురభూత్తస్మాత్సుబాహుస్తస్య చాత్మజః
సుబాహోః శాన్తసేనోऽభూచ్ఛతసేనస్తు తత్సుతః
న హ్యేతస్మిన్కులే జాతా అధనా అబహుప్రజాః
అల్పాయుషోऽల్పవీర్యాశ్చ అబ్రహ్మణ్యాశ్చ జజ్ఞిరే
యదువంశప్రసూతానాం పుంసాం విఖ్యాతకర్మణామ్
సఙ్ఖ్యా న శక్యతే కర్తుమపి వర్షాయుతైర్నృప
తిస్రః కోట్యః సహస్రాణామష్టాశీతిశతాని చ
ఆసన్యదుకులాచార్యాః కుమారాణామితి శ్రుతమ్
సఙ్ఖ్యానం యాదవానాం కః కరిష్యతి మహాత్మనామ్
యత్రాయుతానామయుత లక్షేణాస్తే స ఆహుకః
దేవాసురాహవహతా దైతేయా యే సుదారుణాః
తే చోత్పన్నా మనుష్యేషు ప్రజా దృప్తా బబాధిరే
తన్నిగ్రహాయ హరిణా ప్రోక్తా దేవా యదోః కులే
అవతీర్ణాః కులశతం తేషామేకాధికం నృప
తేషాం ప్రమాణం భగవాన్ప్రభుత్వేనాభవద్ధరిః
యే చానువర్తినస్తస్య వవృధుః సర్వయాదవాః
శయ్యాసనాటనాలాప క్రీడాస్నానాదికర్మసు
న విదుః సన్తమాత్మానం వృష్ణయః కృష్ణచేతసః
తీర్థం చక్రే నృపోనం యదజని యదుషు స్వఃసరిత్పాదశౌచం
విద్విట్స్నిగ్ధాః స్వరూపం యయురజితపర శ్రీర్యదర్థేऽన్యయత్నః
యన్నామామఙ్గలఘ్నం శ్రుతమథ గదితం యత్కృతో గోత్రధర్మః
కృష్ణస్యైతన్న చిత్రం క్షితిభరహరణం కాలచక్రాయుధస్య
జయతి జననివాసో దేవకీజన్మవాదో
యదువరపరిషత్స్వైర్దోర్భిరస్యన్నధర్మమ్
స్థిరచరవృజినఘ్నః సుస్మితశ్రీముఖేన
వ్రజపురవనితానాం వర్ధయన్కామదేవమ్
ఇత్థం పరస్య నిజవర్త్మరిరక్షయాత్త
లీలాతనోస్తదనురూపవిడమ్బనాని
కర్మాణి కర్మకషణాని యదూత్తమస్య
శ్రూయాదముష్య పదయోరనువృత్తిమిచ్ఛన్
మర్త్యస్తయానుసవమేధితయా ముకున్ద
శ్రీమత్కథాశ్రవణకీర్తనచిన్తయైతి
తద్ధామ దుస్తరకృతాన్తజవాపవర్గం
గ్రామాద్వనం క్షితిభుజోऽపి యయుర్యదర్థాః
| ←ముందరి అధ్యాయము | శ్రీమద్భాగవత పురాణము | తరువాతి అధ్యాయము→ |