శ్రీమద్భాగవత పురాణము - స్కంధము 10 - అధ్యాయము 30
| ←ముందరి అధ్యాయము | శ్రీమద్భాగవత పురాణము (శ్రీమద్భాగవత పురాణము - స్కంధము 10 - అధ్యాయము 30) | తరువాతి అధ్యాయము→ |
శ్రీశుక ఉవాచ
అన్తర్హితే భగవతి సహసైవ వ్రజాఙ్గనాః
అతప్యంస్తమచక్షాణాః కరిణ్య ఇవ యూథపమ్
గత్యానురాగస్మితవిభ్రమేక్షితైర్మనోరమాలాపవిహారవిభ్రమైః
ఆక్షిప్తచిత్తాః ప్రమదా రమాపతేస్తాస్తా విచేష్టా జగృహుస్తదాత్మికాః
గతిస్మితప్రేక్షణభాషణాదిషు ప్రియాః ప్రియస్య ప్రతిరూఢమూర్తయః
అసావహం త్విత్యబలాస్తదాత్మికా న్యవేదిషుః కృష్ణవిహారవిభ్రమాః
గాయన్త్య ఉచ్చైరముమేవ సంహతా విచిక్యురున్మత్తకవద్వనాద్వనమ్
పప్రచ్ఛురాకాశవదన్తరం బహిర్భూతేషు సన్తం పురుషం వనస్పతీన్
దృష్టో వః కచ్చిదశ్వత్థ ప్లక్ష న్యగ్రోధ నో మనః
నన్దసూనుర్గతో హృత్వా ప్రేమహాసావలోకనైః
కచ్చిత్కురబకాశోక నాగపున్నాగచమ్పకాః
రామానుజో మానినీనామితో దర్పహరస్మితః
కచ్చిత్తులసి కల్యాణి గోవిన్దచరణప్రియే
సహ త్వాలికులైర్బిభ్రద్దృష్టస్తేऽతిప్రియోऽచ్యుతః
మాలత్యదర్శి వః కచ్చిన్మల్లికే జాతియూథికే
ప్రీతిం వో జనయన్యాతః కరస్పర్శేన మాధవః
చూతప్రియాలపనసాసనకోవిదార జమ్బ్వర్కబిల్వబకులామ్రకదమ్బనీపాః
యేऽన్యే పరార్థభవకా యమునోపకూలాః శంసన్తు కృష్ణపదవీం రహితాత్మనాం నః
కిం తే కృతం క్షితి తపో బత కేశవాఙ్ఘ్రి
స్పర్శోత్సవోత్పులకితాఙ్గనహైర్విభాసి
అప్యఙ్ఘ్రిసమ్భవ ఉరుక్రమవిక్రమాద్వా
ఆహో వరాహవపుషః పరిరమ్భణేన
అప్యేణపత్న్యుపగతః ప్రియయేహ గాత్రైస్
తన్వన్దృశాం సఖి సునిర్వృతిమచ్యుతో వః
కాన్తాఙ్గసఙ్గకుచకుఙ్కుమరఞ్జితాయాః
కున్దస్రజః కులపతేరిహ వాతి గన్ధః
బాహుం ప్రియాంస ఉపధాయ గృహీతపద్మో
రామానుజస్తులసికాలికులైర్మదాన్ధైః
అన్వీయమాన ఇహ వస్తరవః ప్రణామం
కిం వాభినన్దతి చరన్ప్రణయావలోకైః
పృచ్ఛతేమా లతా బాహూనప్యాశ్లిష్టా వనస్పతేః
నూనం తత్కరజస్పృష్టా బిభ్రత్యుత్పులకాన్యహో
ఇత్యున్మత్తవచో గోప్యః కృష్ణాన్వేషణకాతరాః
లీలా భగవతస్తాస్తా హ్యనుచక్రుస్తదాత్మికాః
కస్యాచిత్పూతనాయన్త్యాః కృష్ణాయన్త్యపిబత్స్తనమ్
తోకయిత్వా రుదత్యన్యా పదాహన్శకటాయతీమ్
దైత్యాయిత్వా జహారాన్యామేకో కృష్ణార్భభావనామ్
రిఙ్గయామాస కాప్యఙ్ఘ్రీ కర్షన్తీ ఘోషనిఃస్వనైః
కృష్ణరామాయితే ద్వే తు గోపాయన్త్యశ్చ కాశ్చన
వత్సాయతీం హన్తి చాన్యా తత్రైకా తు బకాయతీమ్
ఆహూయ దూరగా యద్వత్కృష్ణస్తమనువర్తతీమ్
వేణుం క్వణన్తీం క్రీడన్తీమన్యాః శంసన్తి సాధ్వితి
కస్యాఞ్చిత్స్వభుజం న్యస్య చలన్త్యాహాపరా నను
కృష్ణోऽహం పశ్యత గతిం లలితామితి తన్మనాః
మా భైష్ట వాతవర్షాభ్యాం తత్త్రాణం విహితం మయ
ఇత్యుక్త్వైకేన హస్తేన యతన్త్యున్నిదధేऽమ్బరమ్
ఆరుహ్యైకా పదాక్రమ్య శిరస్యాహాపరాం నృప
దుష్టాహే గచ్ఛ జాతోऽహం ఖలానామ్నను దణ్డకృత్
తత్రైకోవాచ హే గోపా దావాగ్నిం పశ్యతోల్బణమ్
చక్షూంష్యాశ్వపిదధ్వం వో విధాస్యే క్షేమమఞ్జసా
బద్ధాన్యయా స్రజా కాచిత్తన్వీ తత్ర ఉలూఖలే
బధ్నామి భాణ్డభేత్తారం హైయఙ్గవముషం త్వితి
భీతా సుదృక్పిధాయాస్యం భేజే భీతివిడమ్బనమ్
ఏవం కృష్ణం పృచ్ఛమానా వ్ర్ణ్దావనలతాస్తరూన్
వ్యచక్షత వనోద్దేశే పదాని పరమాత్మనః
పదాని వ్యక్తమేతాని నన్దసూనోర్మహాత్మనః
లక్ష్యన్తే హి ధ్వజామ్భోజ వజ్రాఙ్కుశయవాదిభిః
తైస్తైః పదైస్తత్పదవీమన్విచ్ఛన్త్యోऽగ్రతోऽబలాః
వధ్వాః పదైః సుపృక్తాని విలోక్యార్తాః సమబ్రువన్
కస్యాః పదాని చైతాని యాతాయా నన్దసూనునా
అంసన్యస్తప్రకోష్ఠాయాః కరేణోః కరిణా యథా
అనయారాధితో నూనం భగవాన్హరిరీశ్వరః
యన్నో విహాయ గోవిన్దః ప్రీతో యామనయద్రహః
ధన్యా అహో అమీ ఆల్యో గోవిన్దాఙ్ఘ్ర్యబ్జరేణవః
యాన్బ్రహ్మేశౌ రమా దేవీ దధుర్మూర్ధ్న్యఘనుత్తయే
తస్యా అమూని నః క్షోభం కుర్వన్త్యుచ్చైః పదాని యత్
యైకాపహృత్య గోపీనామ్రహో భున్క్తేऽచ్యుతాధరమ్
న లక్ష్యన్తే పదాన్యత్ర తస్యా నూనం తృణాఙ్కురైః
ఖిద్యత్సుజాతాఙ్ఘ్రితలామున్నిన్యే ప్రేయసీం ప్రియః
ఇమాన్యధికమగ్నాని పదాని వహతో వధూమ్
గోప్యః పశ్యత కృష్ణస్య భారాక్రాన్తస్య కామినః
అత్రావరోపితా కాన్తా పుష్పహేతోర్మహాత్మనా
అత్ర ప్రసూనావచయః ప్రియార్థే ప్రేయసా కృతః
ప్రపదాక్రమణ ఏతే పశ్యతాసకలే పదే
కేశప్రసాధనం త్వత్ర కామిన్యాః కామినా కృతమ్
తాని చూడయతా కాన్తాముపవిష్టమిహ ధ్రువమ్
రేమే తయా చాత్మరత ఆత్మారామోऽప్యఖణ్డితః
కామినాం దర్శయన్దైన్యం స్త్రీణాం చైవ దురాత్మతామ్
ఇత్యేవం దర్శయన్త్యస్తాశ్చేరుర్గోప్యో విచేతసః
యాం గోపీమనయత్కృష్ణో విహాయాన్యాః స్త్రియో వనే
సా చ మేనే తదాత్మానం వరిష్ఠం సర్వయోషితామ్
హిత్వా గోపీః కామయానా మామసౌ భజతే ప్రియః
తతో గత్వా వనోద్దేశం దృప్తా కేశవమబ్రవీత్
న పారయేऽహం చలితుం నయ మాం యత్ర తే మనః
ఏవముక్తః ప్రియామాహ స్కన్ధ ఆరుహ్యతామితి
తతశ్చాన్తర్దధే కృష్ణః సా వధూరన్వతప్యత
హా నాథ రమణ ప్రేష్ఠ క్వాసి క్వాసి మహాభుజ
దాస్యాస్తే కృపణాయా మే సఖే దర్శయ సన్నిధిమ్
శ్రీశుక ఉవాచ
అన్విచ్ఛన్త్యో భగవతో మార్గం గోప్యోऽవిదూరితః
దదృశుః ప్రియవిశ్లేషాన్మోహితాం దుఃఖితాం సఖీమ్
తయా కథితమాకర్ణ్య మానప్రాప్తిం చ మాధవాత్
అవమానం చ దౌరాత్మ్యాద్విస్మయం పరమం యయుః
తతోऽవిశన్వనం చన్ద్ర జ్యోత్స్నా యావద్విభావ్యతే
తమః ప్రవిష్టమాలక్ష్య తతో నివవృతుః స్త్రియః
తన్మనస్కాస్తదలాపాస్తద్విచేష్టాస్తదాత్మికాః
తద్గుణానేవ గాయన్త్యో నాత్మగారాణి సస్మరుః
పునః పులినమాగత్య కాలిన్ద్యాః కృష్ణభావనాః
సమవేతా జగుః కృష్ణం తదాగమనకాఙ్క్షితాః
| ←ముందరి అధ్యాయము | శ్రీమద్భాగవత పురాణము | తరువాతి అధ్యాయము→ |