శరచ్చ్చంద్రిక
 | ఈ పేజి లైసెన్స్ సమాచారం ప్రకటించుట లేదు. లైసెన్స్ సమాచారం పేజీలు లేని పేజీలు తొలగింపు కు ప్రతిపాదించబడవచ్చు. మీరు సహాయపడడానికి Help:Copyright tags or వ్యాఖ్య చూడండి. |
నవీన విశ్వవిద్యాలయాల్లో
పురాణ కవిత్వంలాగా
శ్రవణ యంత్రశాలల్లో
శాస్త్రీయ సంగీతం లాగా
ఇలా వచ్చేవేం వెన్నెలా!
ఎలా వర్ణించను నిన్ను ?
మహా కవులు లోగడ చెప్పిందే
మళ్ళీ మళ్ళీ చెప్పాలా ?
ఏదో కాస్త భాషా జ్ఞానం
ఇంతో అంతో చ్చందస్సంపదా
ఐదో పదో అలంకారాలు
ఆరో అందులో సగమో ఆవేశం
ఇలాంటివే ఏవో పోగుచేసి
ఇదివరకు నిన్నెప్పుడూ చూడనట్టు
ఇవ్వాళే కొత్తగా కనిపెట్టినట్టు
ఏమని వర్ణించను నిన్ను ?
ఏది రాసినా ఏం లాభం ?
ఇదివరకెవడో అనే వుంటాడు
బహుషా ఆ అన్నదేదో నాకన్నా
బాగానే అని వుండొచ్చు.
అలాంటప్పుడు మళ్ళీ
కలం కాగితం మీద పెట్టి
కళంకంలేని తెల్లదనాన్ని
ఖరాబు చెయ్యడ మెందుకు ?
అనాది నుంచీ నువ్వు
అంత మంది కవులకి
ఉపాదేయ వస్తువుగా నిలిచి
ఉపకారం చేశావు
అలాగే నేనూ ఒకప్పుడు
రొమాంటిక్ ప్రమాదంలో పడి
అమాయకంగా నీ బ్యూటీ
అభివర్ణించాను వృత్తాలలో
ఇవాళ మళ్ళీ అలాగ
ఎలాగ రాయగలను నేస్తం ?
ఇరవయ్యో ఏడు నాకు మళ్ళీ
ఎలా వస్తుంది చెప్పూ ?
అంచేత నీ గురించి
అన్వసరావేశాలు పెంచి
అన్యాపదేసంగానో లేదా
అర్ధాంతరన్యాసంగానో
సొంత కోపాలేవో పెట్టుకొని
పంతాలు పట్టింపులూ పట్టుకొని
ఎవరినీ ఈ వ్యవహారంలో
ఇరికించదలచుకోను నేను !
ఎంతకీ ఆవేశాక కేముంది ?
ఎవడి బతుకు వాడు బతుకుతున్నాడు
ఎంతగా ఎడం ఎడంగా ఉన్నా
ఎంతగా పై పై భేదాలున్నా
ఎంతగా స్వాతిశయం పెరిగినా
ఎంత బలం ధనం జవం పెరిగినా
అంతరంగం అట్టడుగున మాత్రం
అంతమందిమీ మానవులమే !
అందుచేత ఓ చందమామా
అందమైన ఓ పూర్ణసోమా
సముద్రం మీదా అరణ్యం మీదా
సమానంగా ప్రకాశించే సౌందర్యాభిరామా