యుద్ధకాండము - సర్గము 107
|| ఆదిత్యహృదయప్రారమ్భః ||
తతో యుద్ధపరిశ్రన్తం సమరే చిన్తయా స్థితమ్ |
రావణం చాగ్రతో దృష్ట్వా యుద్ధాయ సముపస్థితమ్ || 6.107.1 ||
దైవతైశ్చ సమాగమ్య ద్రష్టుమభ్యాగతో రణమ్ |
ఉపాగమ్యాబ్రవీద్రామమగస్త్యో భగవానృషిః || 6.107.2 ||
రామ రామ మహాబాహో శృణు గుహ్యం సనాతనమ్ |
యేన సర్వానరీన్ వత్స సమరే విజయిష్యసి || 6.107.3 ||
ఆదిత్యహృదయం పుణ్యం సర్వశత్రువినాశనమ్ |
జయావహం జపేన్నిత్యమక్షయ్యం పరమం శివమ్ || 6.107.4 ||
సర్వమఙ్గలమఙ్గల్యం సర్వపాపప్రణాశనమ్ |
చిన్తాశోకప్రశమనమాయుర్వర్ధనముత్తమమ్ || 6.107.5 ||
రశ్మిమన్తం సముద్యన్తం దేవాసురనమస్కృతమ్ |
పూజయస్వ వివస్వన్తం భాస్కరం భువనేశ్వరమ్ || 6.107.6 ||
సర్వదేవాత్మకో హ్యేష తేజస్వీ రశ్మిభావనః |
ఏష దేవాసురగణాన్ లోకాన్ పాతి గభిస్తిభిః || 6.107.7 ||
ఏష బ్రహ్మా చ విష్ణుశ్చ శివః స్కన్దః ప్రజాపతిః |
మహేన్ద్రో ధనదః కాలో యమః సోమో హ్యపాం పతిః || 6.107.8 ||
పితరో వసవః సాధ్యా హ్యశ్వినౌ మరుతో మనుః |
వాయుర్వహ్నిః ప్రజాపాణ ఋతుకర్తా ప్రభాకరః || 6.107.9 ||
ఆదిత్యః సవితా సూర్యః ఖగః పూషా గభస్తిమాన్ |
సువర్ణసదృశో భానుర్హిరణ్యరేతా దివాకరః || 6.107.10 ||
హరిదశ్వః సహస్రార్చిః సప్తసప్తిర్మరీచిమాన్ |
తిమిరోన్మథనః శమ్భుస్త్వష్టా మార్తణ్డ అంశుమాన్ || 6.107.11 ||
హిరణ్యగర్భః శిశిరస్తపనో భాస్కరో రవిః |
అగ్నిగర్భో దితేః పుత్రః శఙ్ఖః శిశిరనాశనః || 6.107.12 ||
వ్యోమనాథస్తమోభేదీ ఋగ్యజుస్సామపారగః |
ఘనవృష్టిరపాం మిత్రో విన్ధ్యవీథీప్లవఙ్గమః || 6.107.13 ||
ఆతపీ మణ్డలీ మృత్యుః పిఙ్గలః సర్వతాపనః |
కవిర్విశ్వో మహాతేజా రక్తః సర్వభవోద్భవః || 6.107.14 ||
నక్షత్రగ్రహతారాణామధిపో విశ్వభావనః |
తేజసామపి తేజస్వీ ద్వాదశాత్మన్నమో స్తు తే || 6.107.15 ||
నమః పూర్వాయ గిరయే పశ్చిమే గిరయే నమః |
జ్యోతిర్గణానాం పతయే దినాధిపతయే నమః || 6.107.16 ||
జయాయ జయభద్రాయ హర్యశ్వాయ నమో నమః |
నమో నమః సహస్రాంశో ఆదిత్యాయ నమో నమః || 6.107.17 ||
నమ ఉగ్రాయ వీరాయ సారఙ్గాయ నమో నమః |
నమః పద్మప్రబోధాయ మార్తాణ్డాయ నమో నమః || 6.107.18 ||
బ్రహ్మోశానాచ్యుతేశాయ సూర్యాయాదిత్యవర్చసే |
భాస్వతే సర్వభక్షాయ రౌద్రాయ వపుషే నమః || 6.107.19 ||
తమోఘ్నాయ హిమధ్నాయ శత్రుఘ్నాయామితాత్మనే |
కృతఘ్నఘ్నాయ దేవాయ జ్యోతిషాం పతయే నమః || 6.107.20 ||
తప్తచామీకరాభాయ వహ్నయే విశ్వకర్మణే |
నమస్తమోభినిఘ్నాయ రుచయే లోకసాక్షిణే || 6.107.21 ||
నాశయత్యేష వై భూతం తదేవ సృజతి ప్రభుః |
పాయత్యేష తపత్యేష వర్షత్యేష గభస్తిభిః || 6.107.22 ||
ఏష సుప్తేషు జాగర్తి భూతేషు పరినిష్ఠితః |
ఏష ఏవాగ్నిహోత్రం చ ఫలం చైవాగ్నిహోత్రిణామ్ || 6.107.23 ||
వేదాశ్చ క్రతవశ్చైవ క్రతూనాం ఫలమేవ చ |
యాని కృత్యాని లోకేషు సర్వ ఏష రవిః ప్రభుః || 6.107.24 ||
ఏనమాపత్సు కృచ్ఛ్రేషు కాన్తారేషు భయేషు చ |
కీర్తయన్ పురుషః కశ్చిన్నావసీదతి రాఘవ || 6.107.25 ||
పూజయస్వైనమేకాగ్రో దేవదేవం జగత్పతిమ్ |
ఏతత్రిగుణితం జప్త్వా యుద్ధేషు విజయిష్యసి || 6.107.26 ||
అస్మిన్ క్షణే మహాబాహో రావణం త్వం వధిష్యసి |
ఏవముక్త్వా తదా గస్త్యో జగామ చ యథాగతమ్ || 6.107.27 ||
ఏతచ్ఛుత్వా మహాతేజా నష్టశోకో భవత్తదా |
ధారయామాస సుప్రీతో రాఘవః ప్రయతాత్మవాన్ || 6.107.28 ||
ఆదిత్యం ప్రేక్ష్య జప్త్వా తు పరం హర్షమవాప్తవాన్ |
త్రిరాచమ్య శుచిర్భూత్వా ధనురాదాయ వీర్యవాన్ || 6.107.29 ||
రావణం ప్రేక్ష్య హృష్టాత్మా యుద్ధాయ సముపాగమత్ |
సర్వయత్నేన మహతా వధే తస్య ధృతో భవత్ || 6.107.30 ||
అథ రవిరవదన్నిరీక్ష్య రామం ముదితమనాః పరమం ప్రహృష్యమాణః |
నిశిచరపతిసఙ్క్షయం విదిత్వా సురగణమధ్యగతో వచస్త్వరేతి || 6.107.31 ||
ఇత్యార్షే శ్రీమద్రామాయణే వాల్మీకీయే ఆదికావ్యే శ్రీమద్యుద్ధకాండే సప్తోత్తరశతతమః సర్గః || 107 ||