పుట:Ranganatha Ramayanamu.pdf/421

నటు దానవానీక మాకోట వెడలఁ - బటుభయంకరవృత్తిఁ బ్లవగవల్లభులు
భూనభోంతరము లాస్ఫోటనధ్వనులఁ - బూని యొక్కట నిండ భూరిసత్త్వముల
దలకొని గిరులును దరువులు వైచి - చెలగించి రప్పుడు సింహనాదములఁ4240
జలమున దైత్యులు చటులబాణములు - బలువిడి గురిసిరి ప్లవగులమీఁద
నసురావళికి మున్నె యాకపివరులు - నసురులఁ జంపంగ నడరి పెల్లారి
కపులకు మున్నె రాక్షసు లుగ్రవృత్తిఁ - గపులఁ జంపెద మని కడక వాటించి
యసమునఁ జలము పెంపార నొండొరుల - వసుమతిపైఁ బడవైతురు కినిసి
యసురులచేతిశస్త్రాస్త్రంబు లొడిసి - వెసఁ బుచ్చి పెళ్లున విఱుతురు కపులు;
కపికోటిచేతివృక్షంబులు గిరులు - కుపితులై విఱుతురు క్రూరదానవులు
కపుల కాళ్ళను బట్టి కదిసి రాక్షసులు - కపులతోడనె మహోగ్రతను వేయుదురు
అసురుల కడకాళ్లు నలమి వానరులు - నసురులతోడనే యడఁతురు బెట్టు
అటుపోర జర్జరితాంగులై నేలఁ - గుటిలదైత్యులుఁ గపికోటులుఁ ద్రెళ్లి
దురములోఁ బడియు నెత్తురులు గ్రక్కుచును - బొరిబొరి మూర్ఛలఁ బొంది యంతటను4250
దెలిసి వానరులును దేవశాత్రవులు - కలిసి కయ్యము సేయఁగా నందుఁ గపులు
దానవుతో నెత్తి దానవు వేసి - యేనుఁగుతో నెత్తి యేనుఁగు నేసి
తురగంబుతో నెత్తి తురగంబు నేసి - యరదంబుఁ గొని కరి నడరంట నేసి
కరి నెత్తుకొని తురంగముఁ బడవైచి - తురగంబు నెత్తి దైత్యుని డొల్లనేసి
యురుసత్త్వధీరులై యుగ్రత నార్చి - తరుచరవీరులు దర్పంబు మెఱసి
పొరిఁ బొరి నిబ్బంగిఁ బొరిపుచ్చుటయును - సురరిపు ల్గొందఱు స్రుక్కుటఁ జూచి
రయమునఁ గోపంబు రంజిల్ల దైత్య - చయమును వానరసమితిపైఁ గదిసి
ప్రదరంబు లేసి చక్రంబుల నేసి - గదల నొప్పించి ఖడ్గంబులఁ ద్రుంచి
భిండివాలంబులఁ బీచంబు లణఁచి - ఖండించి సురియల గండలు బరులు
కుంతశూలంబుల గ్రుచ్చి వానరుల - నింతలింతలు చేసి యెసఁగి యార్చుటయు4260
నంతటఁ బోవక యగచరు లార్చి - యంతంత కడరి దైత్యావళిఁ బట్టి
తరుషండములఁ బర్వతప్రకరముల - నురవడి నెత్తి యత్యుగ్రత వైవఁ
బడియెడిదైత్యులు పాఱుదైత్యులును - నుడుగక యందంద నొరలుదైత్యులును
గలయంగ నెత్తురు గ్రక్కుదైత్యులును - పొలుపరి నేలపైఁ బొరలుదైత్యులును
అందంద నట్టలై యాడుదైత్యులును - మంది ప్రత్యర్థుల మఱచుదైత్యులును
నెక్కినరౌతుల నిటునటుఁ బడఁగ - లెక్కచేయక కరాళించుగుఱ్ఱములు
పక్కెర లూడంగఁ బఱచుగుఱ్ఱములు - దిక్కులు సుడివడఁ దిరుగుగుఱ్ఱములు
కీ లెడలినక్రియ గెడయుగుఱ్ఱములు - కూలి కాళ్లను దన్నుకొనెడుగుఱ్ఱములు
వికలంబులై పోరు విచ్చుగుఱ్ఱములు - నొకరూపు నేర్పడకుండుగుఱ్ఱములు