| చ. |
తనబల మంతయున్ ముని యుదారతపోబలసంపదన్ జెడ
న్గనుఁగొని మానవేంద్రుడు మనంబున నచ్చెరు వొంది చూడఁ ద
త్తనయులు నూర్గు రుద్ధతు లుదగ్రులు రోషవిభీషణాంగు లై
మునిపతి డాసి బి ట్టవియ మొత్తుద మంచుఁ గడంగి శూరతన్.
| 1029
|
వసిష్ఠునికోపంబున విశ్వామిత్రునిసైన్యంబులు హతము లగుట
| తే. |
గిట్టి బెట్టుగ నమ్మౌనిఁ జుట్టు ముట్టి, యట్టహాసంబు సేసిన నట్టె గినిసి
యట్టె కన్నుల మిడుఁగుఱు లుట్టిపడఁగ, గట్టితనమునఁ జెడుఁడంచుఁ దిట్టుటయును.
| 1030
|
| క. |
వా రామునికోపంబున, వీరత్వము శూరతయు వివేకము నెడగా
నీఱై చనిరి మునుల కప, చారంబు లొనర్చునట్టిశఠులు మడియరే.
| 1031
|
| వ. |
ఇట్లు బలంబును గుమారులును నిశ్శేషంబుగా వసిష్ఠునిదివ్యప్రభావంబున
హతు లైనం జూచి విశ్వామిత్రుండు వ్రీడితుం డై నిర్వేగం బగుసముద్రంబు
చందంబున భగ్నదంష్ట్రం బగుభుజంగంబుకైవడి నుపరక్తుం డగుభాస్కరుని
భంగి లూనపక్షం బగువిహంగమంబుచాడ్పున హతపుత్రుండును హతబలుం
డును హతదర్పుండును హతోత్సాహుండును బరమనిర్వేదనపరుండు పై
నిష్ప్రభత్వంబు నొంది.
| 1032
|
| ఉ. |
కొడుకులపాటుఁ జూచి నృపకుంజరుఁ డెంతయు దుఃఖరోషముల్
వొడమఁగఁ బట్టణంబునకుఁ బోయి యుదారుఁ గుమారు నొక్కనిన్
బుడమికి రాజుఁ జేసి చలమున్ మెఱయన్ హిమశైలమందు లో
నడరినభక్తి మీఱ నలికాక్షునిఁ గూర్చి తపం బొనర్పఁగన్.
| 1033
|
విశ్వామిత్రుఁడు శివునివలన సమస్తాస్త్రంబులు పడయుట
| క. |
జనవరుఁ డొనరించుతపం, బున కెంతయు మెచ్చి భుజగభూషణుఁడు రయం
బునఁ బ్రత్యక్షం బై నె, మ్మనమునఁ గృప గదురఁ బలికె మధుమధురోక్తిన్.
| 1034
|
| క. |
నరవర ఘోరతపం బిటు, కర మరుదుగ నేమి గోరి కావించెదవో
వర మొసఁగ వచ్చినాఁడను, గురుమతి నిష్ట మగుదానిఁ గోరు మొసఁగెదన్.
| 1035
|
| క. |
నా విని విశ్వామిత్రుఁడు, భావంబునఁ బొంగి శివునిపాదంబులకుం
గేవలభక్తి నమస్కృతిఁ, గావించి వచించె ఫాలకలితాంజలి యై.
| 1036
|
| మ. |
కృప నాపైఁ గలదేని శంకర ధనుర్విద్యారహస్యంబు య
క్షపతంగోరగసిద్ధచారణనుమరుత్క్రవ్యాదశస్త్రాస్త్రముల్
విపులప్రక్రియ సర్వమున్ దెలియఁగా వేర్వేఱ సాంగంబుగా
నుపదేశింపు మటంచు శత్రుమదనప్రోత్సాహి యై వేఁడినన్.
| 1037
|
| క. |
మెచ్చి వచించిన వన్నియ, నిచ్చితి నరపాల యని మహేశ్వరుఁడు ముదం
బచ్చుపడ వెండికొండకు, విచ్చలవిడి నరిగె దేవవితతులు గొల్వన్.
| 1038
|
