పుట:Chandrika-Parinayamu.pdf/296

చ.⁠

జలరుహనేత్రగాత్రమహి సాంద్రమహాంకురపాళి యంటఁ ద త్కలితమనస్తటాకమును గాఢశరాళి నగల్చి చిత్తజుం డలరు మహారసోత్కరము నచ్చటఁ దారిచె నాఁగ నత్తఱిం బులకిత మైనమైఁ బొరలి పొంగె నవోదితఘర్మవాశ్ఛటల్.

⁠ 124

చ.⁠

చెలి చెలు లందఱుం జనిన సిగ్గది పోవక యున్న దేమి తాఁ జలమున నంచు నెంచి యతిసాంద్రరుషాయుతిఁబోలె ఘర్మవాః కలికలఁ దోఁగి శోణరుచి గన్పడ నొయ్యన జాఱి తద్వధూ కులమణిసమ్ముఖం బెడసెఁ గుంకుమబొట్టురసంబు చయ్యనన్.

⁠ 125

చ.⁠

జలజశరాశుగప్రచురచంక్రమణంబు లమందతం గనన్ గలికి తమిన్ ద్రపాంబుదము గప్పిన నాననచంద్రదర్శనం బలవడ కున్కి నత్తఱి నిజాక్షిచకోరకయుగ్మ మాఁకటం దలఁకుచు నుండ నద్ధరణినాథుఁడు పల్కు రసోత్తరంబుగన్.

⁠ 126

సీ.⁠

వరశంఖపూగసంపద గళస్థము నీకు      సతి! పోఁకముడి సుంతసడల రాదె? కువలయశ్రీ నేలుకొను నేత్రరుచి నీకుఁ      దొయ్యలి! రెం డూరు లియ్య రాదె? ఘనకుందవిభవంబు గను దంతములు నీకు      బిసబాహ! యొకరేఖ యొసఁగ రాదె? బహుదివ్యఫలలక్ష్మిఁ బరఁగువాతెఱ నీకు      నింతి! మంజులకుచం బిడఁగ రాదె?

⁠

తే.⁠

రాజవిజయంబు చేసె నీరమ్యముఖము లేమ! యవనతవృత్తి చాలింప రాదె? నిరుపమరుచిమణికి నీకరయఁ దగునె వరపటలరీతి చే విడువఁగను రాదె?

⁠ 127