ఈ పుట అచ్చుదిద్దబడ్డది
శ్రీలక్ష్మీనరసింహాయనమః
చంద్రికాపరిణయము
షష్ఠాశ్వాసము
క. శ్రీమజ్జటప్రోలుపురీ
ధామ! సుధాధామతిగ్మధామస్ఫూర్జ
త్కోమలనయనద్వయ! యు
ద్దామగుణాభీల! శ్రీమదనగోపాలా! 1
తే. చిత్తగింపుము శౌనకా ద్యుత్తమర్షి
సమితి కిట్లను రోమహర్షణతనూజుఁ
డలనృపతి రేయి శుభలగ్న మనువుపఱిచి
పురము గయిసేయ శిల్పికోత్కరముఁ బనుప. 2
సీ. చంద్రవితానముల్ చక్కఁగాఁ దార్చి రా
స్థానాజిరముల సౌధవ్రజముల,
రామాకృతిశ్రేణిఁ బ్రబలఁ జిత్రించిరి
కురుఁజుల నవమణికుడ్యతటుల,
హరిణకేతుచయంబు వరుసఁ బొందించిరి
సాలాగ్రముల గృహస్తంభతతులఁ,
దోడ్తో నమేరు లద్భుతముగా నిల్పిరి
రాజవీథికల ద్వారప్రతతుల,
తే. విలసితచ్ఛదగుచ్ఛమండలముఁ బూన్చి
రంగడులఁ దోరణస్రగ్లతాంతరముల
నప్పురంబున సకలదేశాధిరాజ
శేఖరులు మెచ్చ నవ్వేళ శిల్పివరులు. 3
