పుట:Chandrika-Parinayamu.pdf/203

తే. నహహ యవ్వేళ పత్త్రతోయధితటస్థ
లకనదతిరోహితప్రవాళము లనంగ,
నమరె నతిరోహితప్రవాళముల నంగ
కనకకరవాలికాప్రమాకరము లగుచు. 34

చ. కలికల రంగదుజ్జ్వలతఁ గన్పడెఁ గాననసీమ ముత్తెముల్
కలి కలరంగ నొంచి నిజగౌరిమచే, నడఁగించి చంద్రమః
కలికల, రంగమై నవసుగంధపరంపర కెల్లఁ, జాల ను
త్కలికలరం గనారతముఁ గాంచిన చూపఱచూడ్కి కుంచుచున్. 35

చ. విరిగమి వొల్చె సర్వవనవీథులఁ, దారకదీధితి చ్ఛిదా
పర మహిమానివారణము, పాంథవధూజన దృష్టిమాలికా
పరమహి, మానితాళికులభవ్యవిహారనివాస, ముజ్జ్వల
త్పరమ హిమానికాజయజ భాసుర చైత్రికకీర్తి యత్తఱిన్. 36

సీ. ఫలియించెఁ దిలకముల్ భసలేక్షణమ్ముల
సురసాలతా సముత్కరము గాంచఁ,
జివురించె నునుఁబొన్న నవసూనసంతతి
సురసాలవల్లరుల్ సరస నవ్వ,
ననఁజూపె బొగడచాల్ నవమధుచ్ఛట నింద్ర
సురసా లలితశాఖ కరము నుమియఁ,
గుసుమించె లేఁగ్రోవి కొమరు వీవలి విభా
సుర సాలవల్లికల్ సొరిది నలమ,

తే. సితవసు రసాల చారుమారుత ముఖాప్త
వరులు మెచ్చంగ మధు వలర్పకయ మున్నె
యలరి సురసాలవైఖరిఁ జెలువు గాంచె
నపు డగశ్రేణి యిట్లు దోహదనిరూఢి. 37