దయగల్ల తల్లులు దీసుక పోయి
పాలో నీలో పోసి పెద్ద జేసిండ్రు
ఎనకో ముందో వాల్ల పిల్లలు బుట్టంగ
ఎడమసేతాబట్టి ఈసడించిండ్రు
అమ్మా అని నోరార బిలవంగా.....
అమ్మగారని పిలిసె పని జూపిచ్చిండ్రు
నన్ను సంపావైతివమ్మా ఓయమ్మా
చెత్తకుండీ తల్లీవమ్మా మాయమ్మా ॥నన్ను॥
మట్టు వాసన ఇంక బోనే లేదు
ఎట్టి పనిల పానమల్లాడుతుంది
పాలు తాగిన యాది రానే రాదు
పాలసేర్లు బలిగె పని జెప్పిండ్రు
లేతసేతులు నాయి కదలకుంటైతే...
కాల్చి పెట్టిన వాత సోపతయ్యేనమ్మా ॥నన్ను॥
తడబడే అడుగులు మారనే లేదు
తనువు పాడుగాను మారింది కొంత
జింకపిల్లని పులులు వేటాడినట్టు
ప్రతివాని చూపులు నా వొంటిమీద
వావి వరుసలు మరిసి వయసు తేడానిడిసి..
కన్నబిడ్డల చెరిచె కామంతో మగవాళ్ళు ॥నన్ను॥
చీమలు పురుగులు కాకులు కుక్కలు
పందులు బర్రెలు ఇరుగు పొరుగమ్మా
సకలజీవికి నువ్వు ఆధారమమ్మా
నువులేక ఈ జగము ఎట్లుంటదమ్మా
కడుపుతీపీ లేని తల్లులెవ్వరో.....
కచ్చితంగ నీకు తెలిసుంట దమ్మా
అంబటి వెంకన్న పాటలు
292