సీ. అగ్రజపీడితుండైన విభీషణు
ఠీవిముం దయజూచినావుగావొ
అలమున భీతుఁడౌ నంబరీషుని యార్తి
నాదంబు మున్ను విన్నావుగావొ
బహుభాదితుండైన ప్రహ్లాదునకును ము
న్నీవు ప్రత్యక్షమైనావు గావొ
ధ్రువముఖ్యులైన భక్తులనెల్ల మున్ను సం
తసమున రక్షించినావుగావొ
గీ. నాఁటి మదిలేదొ? కరుణ నన్గనవు వినవు
రావు ప్రోవవు వేగ పురాణపురుష
తాతతాతవు ముదిమదితప్పినావు
వైరిహరరంహ! సింహాద్రి నారసింహ!26
సీ. గ్రామంబులన్నియుఁ గాల్చి దీపారాధ
నలు చేసి రౌర! యానందముగను
వడి సాధుజనుల సర్వస్వమ్ము గొని శఠ
గోపంబు బెట్టిరి గురుతరముగఁ
బటఘటాదుల పోవ బ్రతిమాలువారి కే
మియ్యక ఘంటవాయించి రహహ!
పెద్దలకడ దుడ్డుపెట్టి ప్రసాదంబు
వడ్డించి తగ [1] పరవశులఁ జేసి
గీ. రవుర! యవనార్చకులు నీకు నాప్తులైరి
భూసురులు చేయు పూజలు పొసఁగవొక్కొ?
యకట! యిది యేమి పాపమునకు వెరువవు
వైరిహరరంహ! సింహాద్రి నారసింహ!27
- ↑ పరాభవము
