682
శ్రీరామాయణము
శ్రీమహాలక్ష్మి రాజీ - వాక్షుఁబోలి
రాముని చిత్తంబు - రంజిల్లఁజేసి
మనుమని యిచ్చిన - మాఱాడ వెఱచి
అనసూయ చేత న - య్యంగ రాగములు
చేకొని సేవించు - సీతనుఁగాంచి
వాకొని యాపతి - వ్రత యిట్టులనియె.
"అతివ! రాఘవుఁడు స్వ - యంవరణమున
అతిశక్తి నినుఁ బెండ్లి - యాడెనటంచు
మునువింటి మది సర్వ - మును దెల్పుఁమనిన
జనకనందన పుణ్య - సాధ్వితో బలికె. 10630
“మాతండ్రి నిమివంశ - మండనుండగుచు
నీతివైఖరి ధ - రణీ చక్రమెల్ల
పాలించి కీర్తి సం - పన్నుఁడై యాగ
శాల దున్నింప నా - చాలు వెంబడినిఁ
బుట్టితి నేను న - భోవాణి పేరు
పెట్టి సీతయటంచు - బేర్కొని నన్ను
బిడ్డల లేనిచోఁ - బ్రేమ నారాజు
గొడ్డువీఁగిన తన - కులకాంతఁ పిలిచి
ననుఁ జేతికిచ్చిన - నాలికి నపుడె
చనుదోయి చేపిపా - ల్జడిగొని కురియ 10640
నన్నుఁబోషింపుచో - నాకు నానాఁట
చిన్నారి పొన్నారి - చిఱుత ప్రాయంబు
వచ్చినఁ దగినట్టి - వరునికీఁ దలఁచి
యిచ్చలో మాతండ్రి - యిట్లని యెంచె.
