| చ. |
నెలఁతుక ! యానృపాలునకు నీకుఁ బరస్పరసంగమంబునం
గలయఁగ డాసి మానసయుగంబు వికాసము నొందుఁగాక పూ
విలుతుని దేహయష్టిఁ బ్రభవింపఁగఁ జేయ సమర్థమైన ని
ర్మలపరమాణుయుగ్మకముమాడ్కిని దైవమనోనుకూలతన్.
| 95
|
| శా. |
గ్రీవాలంకృతిపట్టసూత్రలతికాశ్రీకారరేఖాంకితన్
దేవీ! యవ్రణవంశసంభవగుణాన్వీత న్నినుం గాయజుం
డావిర్భూతరతిం ధనుర్లతికఁ గా నంగీకరించుం బలే!
పూవింట న్నిషధాధినాథు గెలువుం బూనంగ రాకుండుటన్.
| 96
|
| తే. |
తరుణి! నతనాభిమండలోదంచనాభి
రామరోమావళీజ్యావిరాజమాన
నీదుతను పుండవిలు సేసి నెఱకు లేయు
రతివరుఁడు హారగుళికల రాజహంసు.
| 97
|
హంస దమయంతి వీడ్కొని నలునకు దూత్యసిద్ధిం దెల్పుట
| వ. |
అని పలికి వీరె సఖులు వచ్చుచున్న వారు, మంత్రరహస్యంబులు బయలుపడ కుండవలయు, నన్ను వీడుకొల్పు, పోయివచ్చెద నని తదనుమతి వడసి గగనమార్గంబున నిషధాధిపరాజధానికి నభిముఖుండై చనియె నప్పుడు.
| 98
|
| మ. |
మరువాలారుశరంబులం దొరఁగుకమ్మందేనెతోఁ గూడి య
య్యరవిందాక్షికిఁ బక్షిపుంగవగవీహయ్యంగవీనంబు ని
ర్భరహర్షంబు నొనర్చె మున్ను రుచిసౌరభ్యంబునం బిమ్మటన్
మురియుం ద్రోయుచు నూన్చె నెమ్మనమునన్ మూర్ఛాసముచ్ఛ్రాయమున్.
| 99
|
