మేలమేల లతాంగి కడుదుమ్మెదలె మెదలెడుపొదలు దూఱెదు
చాలుచాలుగ నున్నబాలరసాలసాలము లెక్కఁగోరెదు
గుప్పుగుప్పున వాసనలఁ బైకొంచు కొంచును గాక గాత్రము
గప్పు గప్పురపుందుమారము కదలి కదలిచినంతమాత్రము
వామవామకరంబుచే లత వంచి వంచితబుద్ధితో నన
లేమిలేమిటు పసరుమొగ్గలె యేరియేరినిఁ జూడ నీనన
గరముఁ గరమున నలరుతమ్మిమొగడలు గడలుగఁ జాఁపి యేపునఁ
దెఱవ తెరవడి జోపెదవు పూఁదేనెఁదేనెటు లొదవుఁ గోపునఁ
దనరు తనరుచి యంతకంతకుఁ దరము దరమును మదినిఁ గేరుచు
నునుప నునుపగుమొగలివిరి నీకొప్పుకొప్పున వలపు మీఱుచు
మాను మానునుఁ బోఁకబోదెలమరువె మరువేశ్మస్థలం బగుఁ
జాన జానగుననలు గోయఁగఁ జాగి జాగిపుడేఫలం బగుఁ
బొగడ పొగడఁగఁ దగిన దిఁక నీబోఁటిబోటికి దీనిసుమములు
తగవె తగవె మఱొండుపొదలకుఁ దాఱి దాఱి దొలంగుక్రమములు
పూని పూ నిలువెల్ల ననిచినపొన్నపొన్నలచెంత కరుగుట
మాని మానిని మేలె యిచటనే మట్టిమట్టియ లఱుగఁ దిరుగుట
తలరె తలరెడువిరులు దొరకినదాఁక దాకఫలంబు లేఱకె
యలసి యలసికతామయంబులయంద యందఱు నుంటి రూరకె
రమణి రమణీయంబుగాఁ గలరవము రవము చెలంగె మాటికి
ప్రమదప్రమదము మీఱఁ బైకొని బహులబహులలు ద్రుంప నేటికి
సారసారససౌరభము వెదచల్లఁ జల్లనికొలనిచెంతను
మీరి మీ రిపు డలవికెల్ల శమింప మింపను టేమివింతను
ఎన్న నెన్నఁడు నెఱుఁగ మిటు పరువేల వేలతరంపుఁబువ్వులు
కన్నె కన్నెఱసేసి కోపము గ్రమ్మ గ్రమ్మఱఁ జనెదుదవ్వులు
క్రింది క్రిందిగ రాదు యీకంకేలికేలికి విరులు పొందుగ
నందనందమె బడలు టోగజయాన యానగ మెక్కి, ముందుగ
మధుపమధుపవనాదులను బగమాన మానసమున నుతింతమె
మధురమధురసకుసుమములు పలుమాఱు మారున కిడి భజింతమె.
