గుడుముల్‌ దోసెలు సారెసత్తులడుకుల్‌ గుగ్గిళ్లునుం బెట్టుచుం
జెడి యెందుం గొఱగాకపోదురకటా! శ్రీకాళహస్తీశ్వరా!84
శా. విత్తజ్ఞానము పాడుచిత్తము భవావేశంబు రక్షాంబువుల్‌
మత్తత్త్వంబు తదంకురం బనృతముల్‌ మాఱాకులత్యంత దు
ర్వృత్తుల్‌ పువ్వులు పండ్లు మన్మథ ముఖావిర్భూత దోషంబులుం
జిత్తాభ్యున్నత నింబభూజమునకున్‌ శ్రీకాళహస్తీశ్వరా!85
శా. నీపై గావ్యము చెప్పుచున్నయతఁడు న్నీపద్యముల్‌ వ్రాసియి
మ్మా పాఠంబొనరింతు నన్నయతఁడున్‌ మంజుప్రబంధంబు ని
ష్టాపూర్తింబఠియించుచున్న యతఁడున్‌ సద్బాంధవుల్‌గాక చీ
చీ పృశ్ఠాగత బాంధవంబు నిజమా శ్రీకాళహస్తీశ్వరా!86
శా. సంపద్వర్గముఁ బాఱఁదోలి రిపులన్‌ జంకించి యాకాంక్షలన్‌
దంపుల్వెట్టి కళంకముల్నఱికి బంధక్లేశ దోషంబులం
జింపుల్చేసి వయోవిలాసములు సంక్షేపించి భూతంబులం
జెంపల్వేయక నిన్నుఁ గాననగునా? శ్రీకాళహస్తీశ్వరా!87
శా. రాజశ్రేణికి దాసులై సిరులఁ గోరం జేరఁగా సౌఖ్యమో
యీ జన్మంబు తరింపఁజేయఁగల మిమ్మే ప్రొద్దు సేవించు ని
ర్వ్యాజాచారము సౌఖ్యమో తెలియలేరో మానవు ల్బాపరా
జీజాతాది మదాంధ బుద్ధులగుచున్‌ శ్రీకాళహస్తీశ్వరా!88
పుట:భక్తిరసశతకసంపుటము 3.pdf/64
ఈ పుట అచ్చుదిద్దబడ్డది
