Jump to content

పుట:బ్రహ్మోత్తరఖండము (శ్రీధరమల్లె వేంకటరామార్యుఁడు).pdf/287

వికీసోర్స్ నుండి
ఈ పుట ఆమోదించబడ్డది

280

బ్రహ్మోత్తరఖండము


ఆ.⁠

అనుచుఁ దెలియఁ బలికి యాశంభుదూతలు
శమను వీడుకొనుచు సకలజనులు
చూచుచుండ భూమిసురుఁ జేర్చి రప్పుడు
ప్రాకటంపుఁబుణ్యలోకమునకు.

⁠ 30


వ.⁠

అట్లు గాన సమస్తపాపక్షయంబును మహేశ్వరవిభూషణం
బును నైన భస్మంబు నిరంతరంబు నాచేత ధరియింపంబడు
చుండు ననిన విని యాబ్రహ్మరాక్షసుండు క్రమ్మఱ భస్మ
ప్రభావశ్రవణకుతూహలుం డై యమ్మునీంద్రున కి ట్లనియె.

⁠ 31


క.⁠

మునినాథ భవద్దర్శన
మున ధన్యుఁడ నగుచు నఘవిముక్తుఁడ నయితిన్
దనరుచు జన్మాంతరకృత
ఘనతరసుకృతప్రభావకారణమహిమన్.

⁠ 32


మ.⁠

అలఘుప్రాభవ పూర్వజన్మమున సస్యారామవాటీలస
త్సలిలక్షేత్ర మొసంగితిన్ యవనభూపాలుండనై యొక్క ని
శ్చలచిత్తుం డగుబ్రాహ్మణోత్తమునకున్ సంప్రీతితోఁ గావునన్
గలుషవ్రాతములెల్ల వీడెను భవత్కారుణ్యలేశంబునన్.

⁠ 33


క.⁠

ఇరువదియే నగుభవమున
నురుతరతేజుఁ డగునొక్కయోగీంద్రుకృపన్
దురితంబులఁ బాయుదువని
తరణిసుతుం డానతిచ్చెఁ దథ్యము గాఁగన్.

⁠ 34


తే.⁠

అట్లు గావున నిర్జనం బైనవనము
నందుఁ ద్వత్సంగతి ఘటించె నద్భుతముగ
నింక భస్మంబు ధరియించియేని దురిత
కర్మములఁ బాయువాఁడ నిక్కము మహాత్మ.

⁠ 35