పుట:ప్రబోధచంద్రోదయము.pdf/182

ప్రబోధచంద్రోదయము

చతుర్థాశ్వాసము

క.⁠

శ్రీగౌరీకుచకుంభా భోగమృగమదానులేపభూషితవక్షో భాగశివదత్తనిర్మల భోగాంగ యనంతమంత్రిపుంగవ గంగా!

⁠ 1

వ.⁠

అవధరింపు మట్లు శ్రద్ధాలలనవలన విష్ణుభక్తిమహాదేవిసందేశంబు విని పర మానందంబు నొంది సుకృతకర్మవ్యవసాయపరులకు దైవసాహాయ్యంబు గలుగునని పెద్దలు చెప్పుట నిజమయ్యె నిప్పుడు విష్ణుభక్తిమహాదేవి పనకుఁ దానె నామీఁది యనుగ్రహంబున నీశ్రద్ధావధూటిచేత నీవు కామాదుల గెలువ నుద్యోగింపుము నేను దో డయ్యెద నని యానతిచ్చి పుత్తెంచెం గావున నింక నస్మదీయమనోరథం బప్రయాసంబున సిద్ధించు నని వివేకమహారాజు మహామోహునిచేత జగంబులు మోసపోవుతెఱం గంతరంగంబునఁ దలంచి.

⁠ 2

చ.⁠

అనఘ మనంత మచ్యుతచిదాత్మసుధాంబుధినిస్తరంగమం దనిశము మగ్నులయ్యుఁ జని యానక సంస్కృతి యన్ మరీచికా వననిధి వెంట వెంటఁ జని వారక యీఁదుచు నాస్పదింపుచున్ మునుఁగుచు లేచుచుందు రిదె మూఢజనంబులు మోహచేష్టలన్.

⁠ 3

ఆ.⁠

ఇట్టిమోహభూత మిరవగు సంసార సాల మనవబోధమూలయుతము కాన నీశ్వరాంఘ్రికమలార్చనాజాత బోధగజము చేరి పోవవైచు.[1]

⁠ 4

1. ఇది యొకప్రతియం దున్నది. ప్రక్షిప్తమయి యుండును.