పుట:పద్మపురాణము (మడికి సింగన).pdf/107

ఉత్తరఖండము-ద్వితీయాశ్వాసము

75

ఆ.⁠

ఎవ్వనింటనేని [1]యే యోగి భుజియించి సంతసిల్లు నతని జన్మకృతము లైన యఘము లెల్ల నా క్షణంబునఁ బాయు నవ్యయత్వ మొందు నాతఁ డనఘ!

⁠ 151

ఆ.⁠

కాన నాటి పుణ్యకర్మంబు నీ యగ్ర జునకు నిచ్చి యతని సుకృతిఁ జేయు మనిన దూత మాట విని వికుండలుఁడును దత్ఫలంబు నపుడు దారవోసె.

⁠ 152

వ.⁠

ఇట్లు దారవోయుటయుం దత్పుణ్యఫలమాహాత్మ్యంబున నరక కూపంబు వెలువడి మంచు విరియించి యేతెంచు మార్తాండు చందంబున వచ్చి శ్రీకుండలుండు దమ్మునికడ నిల్చినం గనుం గొని పులకితశరీరుండై గద్గదకంఠుం డగుచు వికుండలుం డన్న కిట్లనియె.

⁠ 153

క.⁠

రెయ్యును బగలును నరకపు గ్రయ్యలఁ బడి వెడల నీఁదఁ గానక మేనిం [2]తయ్యున్నదయ్య [3]శివశివ అయ్యో! నా యన్న! యెంత యడలితివొ కటా!

⁠ 154

వ.⁠

అని వికుండలుం డన్నకు నమస్కరించి సర్వాలింగనంబు చేసెఁ దదనంతరంబ.

⁠ 155

క.⁠

ఇరువురఁ గని సురసంఘము గురుతరముగఁ బుష్పవృష్టి గురియఁగ నంతన్ సురదూతఁ జూచి మ్రొక్కుచుఁ బరమానందమున వైశ్యపతి యిట్లనియెన్.

⁠ 156

1. యోగి భుజించిన (ము)
2. తయ్యెనె యోహో శివశివ (హై)
3. హరి హరి (తి)