తే. గీ. |
ప్రతిదినక్లేశమార్జనపాలనముల
నట్లు గావున ధనబాంధవాదిరూప
లక్ష్మి విద్యుచ్చలంబు; చలంబు గాక
యున్న సంసారరుచి బుధుం డొందకున్నె.
| 100
|
క. |
అది గాన బాహ్యలక్ష్మిన్
మదిఁ దలఁచిన యట్టి దుష్టమతులకు సర్వ
ప్రదుఁడైన శ్రీవిభుండే
మొదలన్ సేవ్యుండు నీతిమూలం బగుచున్.
| 101
|
క. |
కారుణ్యసాగరం బగు
నారాయణుఁ డిచ్చు నిజజనమనో౽నుసృతిన్
బేరుగ బాహ్యాభ్యంతర
సారతరోదారసకలసంపల్లీలన్.
| 102
|
క. |
లీలానృష్టజగత్రయు
శ్రీలక్ష్మీనాథు హృదయసేవ్యుఁ గృపావ్యా
లోలు రమాపతిఁ గొలువక
జాలింబడి యొకని గొల్చు జడుఁడు ఘనుండే.
| 103
|
క. |
అని సుతుఁడు పల్క దితినం
దనుఁ డుద్భటతప్తతైలధారలలో వా
రినిషేకం బొనరించిన
యనూనరోషాగ్ని కన్ను లంటఁగఁ జూచెన్.
| 104
|
హిరణ్యకశిపుఁడు ప్రహ్లాదుని హింసింప భటులం బనుచుట
వ. |
చూచి యతిభయంకరులైన నిజకింకరులం బిలిచి వీని నింతింతలుగా
విశసించుండు. ఎట్లు రక్షించునో యని యప్పుడే హరిసంస్తవంబు
చేసినఫలం బనుభవించుం గాక; కాకోలూకకంకగృధ్రంబులకు వీని
మాంసం బాహారంబుగా నొసంగంజేయుఁడు హరిస్తవంబు విడిచె
నేని విడువుండని నియోగించిన.
| 105
|