ఈ పుట ఆమోదించబడ్డది
రేకు: 0168-03 ధన్నాసి సం: 02-330 భగవద్గీత కీర్తనలు
పల్లవి: నీ వెంత నే నెంత నేఁడు నాయగ్గలి కెంత
దేవ నీదాసులఁ జూచితేనే నిన్నుఁ గనుట
చ. 1: వొక్కొక్క రోమకూపాన నొగి బ్రహ్మాండకోట్లు
ఉక్కుమీరి ధరించుక ఉన్నాఁడవట
నిక్కిన నీరూప మెంతో నిన్నుఁ గనుఁగొను టెట్టు
అక్కజపు వేదముల కగోచరుఁడవు
చ. 2: యెన్నో శిరసులట యెన్నో పాదములట
యెన్నరాని చేతులట యిట్టి నీమూర్తి
కన్నులఁ జూచుట యెట్టు కడగురు తందు కేది
అన్నిటా మునీంద్రులకు నచింత్యుఁడవు
చ. 3: కోటిసూర్యు లొక్కమాటే కూడ నుదయించినట్టు
గాటపు నీతిరుమేనికాంతులట
మేటివి శ్రీవేంకటేశ మిమ్ము ద్రిష్టించుట యెట్లు
పోటిదేవతలకెల్లాఁ బొడవైనవాఁడవు
