పుట:తాళ్ళపాక పదసాహిత్యం - రెండవ భాగం.pdf/314

రేకు: 0165-02 నాదరామక్రియ సం: 02-313 శరణాగతి

పల్లవి: అతఁడు లోకోన్నతుఁ డాదిమపురుషుఁడు అన్నిటాను పరిపూర్ణుఁడు
చతురుఁడితఁడే రక్షించఁగలవాఁడు శరణని బ్రదుకవో వో మనసా

చ. 1: మరుతండ్రిఁ జూచిన మంచికన్నులను మరొకరిఁ జూచిన నింపౌనా
సిరువరు నామమునొడిగిన నోరను చిక్కిన పేరులు యితవౌనా
పరమాత్ముఁ దలచిన మనసులోపలను పరులఁ దలఁచితే నొడంబడునా
కరుణానిధి పుణ్యకథలువినిన చెవుల కడలసుద్దులు విన సమ్మతించునా

చ. 2: నరహరిఁ బూజించినయట్టి కరములు నరుల సేవసేయ నరుహములా
మురహరు శరణని మొక్కిన శిరసున మూఢులకు మొక్క నుచితములా
హరిమందిరమున కరిగెడు పదములు అధములిండ్ల కేఁగఁగ నలవడునా
పురుషోత్తము లాంఛనము మోచిన మేను భువి హీనవృత్తికిఁ బొసఁగీనా

చ. 3: గోవిందుఁడే దిక్కై వుండు ఘనులకు కొలిపీనా దేవతాంతరంబులు
భూవల్లభుదెసఁ బుట్టిన జ్ఞానము పొంది వేరొకట నిలిచీనా
శ్రీవేంకటపతిపై నిడిన భక్తి చెలులపై నునుపఁగఁ దగవవునా
దేవకినందనుఁ డితనిదాసులఁ దెలియఁగ జడులకుఁ దరమయ్యీనా