ఈ పుట అచ్చుదిద్దబడ్డది
రేకు: 0218-01 గుండక్రియ సం: 03-096 అధ్యాత్మ
పల్లవి:
వివరము మాలినట్టి వెఱ్ఱిదేహి తొల్లి
జవకట్టినంతే కాక చండ పోరనేఁటికే
చ. 1:
మనసంతే మంగళము మరి యెంత పొరలినా
తనువు కొలఁదియే సత్వములెల్లాను
తన కలిమెంచుకోక తగని మురిపెముల
పెనఁగఁబోతే తీపు పిప్పిలోనఁ గలదా
చ. 2:
చెంది విత్తిన కొలఁదే చేరి మొలచేటి పైరు
అంది ఆఁకటి కొలఁదే ఆహారమెల్ల
ముందువెనక చూడక మొక్కలపు పరువేల
అందని మానిపంటికి నాసపడవచ్చునా
చ. 3:
శ్రీవేంకటేశ్వరుఁ గొలిచిన కొలఁదియే మేలు
భావించ నాతఁడిచ్చేది భాగ్యమెల్లాను
వేవేలు మొక్కులేల వెస నానాఁటికి నెల్ల
తోవగాని తోవఁ బోతే తుదకెక్కఁగలదా
