ఈ పుట ఆమోదించబడ్డది
రేకు: 0293-04 లలిత సం: 03-539 వైష్ణవ భక్తి
పల్లవి:
వీరు వారనేటివింతేల
శ్రీరమణుని కృప సిద్ధముఁ గాక
చ. 1:
యెక్కడి పాపము యెక్కడి పుణ్యము
దక్కిన శ్రీపతిదాసునికి
పక్కన లోహముఁ బరుసము దాఁకిన
యెక్కువనంతా హేమమే కాదా
చ. 2:
యేది హీనము యేది యధికము
పాదుగ నడచు ప్రపన్నునికి
మేదినీశుఁ డేమెలుఁతఁ బెండ్లాడిన
సాదించ నేలికసానే కాదా
చ. 3:
యేడ నింద లిఁక నేడ సంస్తుతులు
జాడల శ్రీవైష్ణవునికిని
యీడనే శ్రీవేంకటేశుఁ డాత్మయట
యీడులేని యతఁ డెక్కుడే కాదా
