ఈ పుట ఆమోదించబడ్డది
రేకు: 0290-04 పాడి సం: 03-521 హనుమ
పల్లవి:
కలశాపురము కాడ గంధపు మాకుల నీడ-
నలరేవు మేలు మేలు హనుమంతరాయ
చ. 1:
సంజీవికొండ దెచ్చి సౌమిత్రి బ్రతికించితి
భంజించితి వసురుల బలువిడిని
కంజాప్తకుల రాఘవుని మెప్పించితివి
అంజనీతనయ వో హనుమంతరాయ
చ. 2:
లంక సాధించితివి నీ లావులెల్లాఁ జూపితివి
కొంకక రాముని సీతఁ గూరిచితివి
లంకెల సుగ్రీవునికి లలిఁ బ్రధాని వైతివి
అంకెలెల్లాఁ నీకుఁ జెల్లె హనుమంతరాయ
చ. 3:
దిక్కులు గెలిచితివి ధీరతఁ బూజ గొంటివి
మిక్కిలి ప్రతాపాన మెరసితివి
ఇక్కువతో శ్రీవేంకటేశ్వరు బంట వైతివి
అక్కజపు మహిమల హనుమంతరాయ