ఈ పుట ఆమోదించబడ్డది
రేకు: 0244-02 వరాళి సం: 03-249 శరణాగతి
పల్లవి:
దైవమా నీచేతిదే మాధర్మపుణ్యము
పూవువంటి కడు లేఁతబుద్ధివారము
చ. 1:
యేమిటివారము నేము యిదివో మాకర్మ మెంత
భూమి నీవు పుట్టించఁగఁ బుట్టితిమి
నేమముతో నడచేటి నేరుపేది మావల్ల
దీముతో మోచిన తోలుదేహులము
చ. 2:
యెక్కడ మాకిఁక గతి యెరిఁగే దెన్నఁడు నేము
చిక్కినట్టి నీ చేతిలో జీవులము
తక్కక నీ మాయలెల్లఁ దాఁటఁగలమా మేము
మొక్కలపుటజ్ఞానపు ముగ్ధలము
చ. 3:
యేది తుద మొదలు మాకిఁక నిందులో నీవే
ఆదిమూర్తి నీకు శరణాగతులము
యీదెస శ్రీవేంకటేశ యేలితివి నన్ను నిట్టె
నీదయ గలుగఁగాను నీ వారము
