ఈ పుట ఆమోదించబడ్డది
రేకు: 0235-02 లలిత సం: 03-199 నామ సంకీర్తన
పల్లవి:
నమో నారాయణ నా విన్నప మిదివో
సమానుఁడఁ గాను నీకు సర్వేశ రక్షించవే
చ. 1:
మనసు నీ యాధీనము మాటలు నీ వాడేటివే
తనువు నీపుట్టించిన ధన మిది
మును నీపంపున నిన్ని మోచుకున్నవాఁడ నింతే
వెనక నన్ను నేరాలు వేయక రక్షించవే
చ. 2:
భోగములెల్లా నీవి బుద్దులు నీవిచ్చినవి
యీగతి నాబతుకు నీ విరవైనది
చేగదేర నీవు నన్నుఁ జేసిన మానిసి నింతే
సోగల నాయజ్ఞానము చూడక రక్షించవే
చ. 3:
వెలి నీవే లో నీవే వేడుక లెల్లా నీవే
కలకాలమును నీకరుణే నాకు
యిల శ్రీవేంకటేశ నీవేలుకొన్నబంట నింతే
నెలవు దప్పించక నీవే రక్షించవే
