ఈ పుట ఆమోదించబడ్డది
రేకు: 0231-01 ధన్నాసి సం: 03-174 అధ్యాత్మ
పల్లవి:
వెఱ్ఱి దెలిసి రోఁకలి వెసఁ జుట్టుకొన్నట్టు
యిఱ్ఱి దీముభోగముల నెనసేము
చ. 1:
మురికిదేహము మోచి మూలల సిగ్గుపడక
పొరిఁ బరిమళములు పూసేము
పరగ పునుకతల పావనము సేసేమంటా
నిరతితోడ దినము నీట ముంచేము
చ. 2:
పుక్కట పంచేంద్రియపు పుట్టు వుట్టి యందరిలో
మొక్కించుక దొరలమై మురిసేము
అక్కర నజ్ఞానమనే అంధకారమున నుండి
దిక్కుల నెదిరివారిఁ దెలిపేము
చ. 3:
దినసంసారమే మాకు దేవుఁడని కొలుచుక
వెనుకొని ఘనముక్తి వెదకేము
యెనలేక శ్రీవేంకటేశ మమ్ముఁ గావఁగాను
తనిసి తొల్లిటిపాటు దలఁచేము