ఈ పుట ఆమోదించబడ్డది
రేకు: 0222-03 సాళంగనాట సం: 03-122 కళ్యాణ కీర్తనలు
పల్లవి:
తిరువీధు లేఁగీని దేవతలు జయవెట్ట
హరి వాఁడె పెండ్లికొడుకై ప్రతాపమున
చ. 1:
కనకపుఁ గొండ వంటి ఘనమైన రథముపై
దనుజమర్దనుఁడెక్కె దరుణులతో
వినువీధిఁ బడెగె(డగ?)లు వేవేలు కుచ్చులతోడఁ
బెనగొనఁగఁ గదలె భేరులు మ్రోయఁగను
చ. 2:
వరుసఁ జంద్రసూర్యులవంటి బండికండ్లతోడ
గరుడధ్వజుఁ డొరసిఁ గడుదిక్కులు
పరగు వేదరాసులే పగ్గాలు వట్టితియ్యఁగ
సరుగ దుష్టులఁ గొట్టి జయము చేకొనెను
చ. 3:
ఆటలుఁ బాటలు వింటా నలమేల్మంగయుఁ దాను
యీటున శ్రీవేంకటేశుఁ డెదురులేక
వాటపు సింగారముతో వాకిటవచ్చి నిలిచీ
కోటానఁగోటి వరాలు కొమ్మని ఇచ్చుచును