ఈ పుట అచ్చుదిద్దబడ్డది
రేకు: 0383-03 లలిత సం: 04-484 శరణాగతి
పల్లవి:
ఇన్నిళ్ళు నెఱఁగక యిందులోనే వోలాడితి
మన్నించఁగా నీవల్లనే మరిగితి నిన్నును
చ. 1:
ముందు నేఁజేసినకర్మములు దోలుకరాఁగాను
అంది మరఁగుఁ జొచ్చితి నందుకే నీకు
కందువఁ బంచేంద్రియాలు కదిమి పై కొనఁగాను
చందములన్నిటా నీకు శరణంటిని
చ. 2:
వెనకటి సంసారము విడువక వుండఁగాను
వినయాన నీడాగు వేసుకొంటిని
ఘనమైన జన్మములు కాణాచియై తగులఁగ
మొనసి నీ పాదాలకు మొక్కితి నేను
చ. 3:
జీవుల సంగాతాలు చిమ్మి రేఁచి యంటుకోఁగా
భావించి నీ మీఁదటిబత్తి వట్టితి
శ్రీ వేంకటేశుఁడవు నీదేవు లలమేలుమంగ
నీవు నాకు బుద్ధియ్యఁగా నిన్నే పాడితిని
