ఈ పుట అచ్చుదిద్దబడ్డది
రేకు: 0359-04 బౌళి సం: 04-348 మాయ
పల్లవి:
ఏమిసేయుదు నింతయు నీ మాయ
సామజవరద నా చందమిది
చ. 1:
జలము లోపలనున్నచందురు నీడవలె
నలుగడలఁ గదలీ నా మనసు
పెలుచు మేఘములు గప్పిన సూర్యునివలె
వెలుఁగదు నాలోని విజ్ఞానము
చ. 2:
కడఁగి యాకసమున గాలి యణఁగినట్లు
వడిఁగానరాదు నా వైరాగ్యము
ముడిగి ముత్తెపుఁ జిప్పముత్యము విధంబున
జడిసీ నాలోని సాత్వికము
చ. 3:
యిప్పుడిట్టె శ్రీ వేంకటేశ నీ కృపవలె
వుష్పతిల్లె నిజభక్తి యొక్కటై నీపై
కప్పిన నీ సేవవలెఁ గన్న నిధానమువలె
అప్పసమై నిలిచె బ్రహ్మానందము