ఈ పుట అచ్చుదిద్దబడ్డది
రేకు: 0241-1 సామంతం సంపుటం: 08-241
పల్లవి:
వింత లాపెవద్దనుండి వినీఁ గాని
యింతయు మాతో నానతియ్యవయ్య నీవు
చ. 1:
చెప్పినట్టె సేసి తెలిసిగ్గువడి వున్నదింతె
అప్పుడె మెచ్చెఁజుమ్మీ ఆపె నిన్ను
కుప్పరగంధి మతిలోఁగలమాట నేమాడేము
చెప్పేమాటలు మాతోనె చెప్పవయ్య నీవు
చ. 2:
మన్నించితి వన్నిటాను మనసు వచ్చెవున్నది
కన్నులనె మొక్కెఁజుమ్మీ కాంతనీకు
సన్నలు సేసినమోల్లా సరినేము దెలిపేము
యిన్నియు మాకుత్తరము లియ్యవయ్య నీవు
చ. 3:
కాఁగిటఁ గూడితి విదె కైకొనె నలమెల్‌‌మంగ
ఆఁగి వురమెక్కెఁజుమ్మీ ఆపె నిన్నంటి
వీఁగము శ్రీవెంకటేశ విన్నవించే మిఁక నీతో
పోఁగు వోఁగుఁ బొంద మమ్ముఁ బొందించుమీనీవు
