ఈ పుట అచ్చుదిద్దబడ్డది
రేకు: 0060-4 శంకరాభరణం సంపుటం: 06-112
పల్లవి:
ఓయమ్మ వెరపించె నొకభూతమూ
రోయక యిన్నిటనుం దిరుగు భూతమూ
చ. 1:
పది శిరసుల పెద్ద బమ్మ రాకాసునిని
జెదరనీక యడిచిన భూతమూ
మదమున బాలెంత మగువ నెత్తురు పిన్న
పెదవిఁ బీలిచెఁ బెను భూతమూ
చ. 2:
వేయి చేతుల పెద్ద వెడగు దానవునిఁ
జేయి చాఁచి యడిచిన భూతమూ
రాయడింపుచు బెద్దదంటరక్కసుని
బాయం జీరిన బలు భూతమూ
చ. 3:
పడుచుఁ బట్టుక వేఁచే పసిఁడిదైత్యునిని
కడుపు చించిన ఘన భూతమూ
అడరి శ్రీ తిరువేంకటాద్రి మీఁద నుండి
పొడచూపె నదివో పెంపుడు భూతమూ